CD Stellingwarfs Volkslied

Deensdag 18 meert was op de basisschoele De Blesse de prissentoasie van de spiksplinterni’je cd mit daorop et Stellingwarfs Volkslied. De cd zit in een zonuumd mediaboekien van 24 bladzieden dikke, mit veul ommedaenken veur et biezundere van de regio Stellingwarf, en uteraord de woorden en de wieze van et volkslied. Et Stellingwarfs Volkslied wodde in de vuuftiger jaoren van de veurige ieuw schreven deur Hendrik Johannes Bergveld. Veur de meziek zorgde doe Han Bokelman.

Et idee om et volkslied op disse wieze uut te geven ontston al weer een posien leden. Dat gebeurde tiedens de saemenwarking van Magda Dullemond (uutgeveri’je Boom) mit Henk Bloemhoff (Stellingwarver Schrieversronte) angaonde verschillende onderwarpen t.b.v. de websteden van Boom. De Stellingwarver Schrieversronte pakte et idee veerder op en et uuteindelike risseltaot wodt now deensdag prissenteerd.

Veur de cd wodde et Stellingwarfs Volkslied zongen deur et mingd koor ‘Oons genoegen’ van Hooltpae, o.l.v. dirigente Hinke Jelsma van Kollumerzwaog. Op de cd is ok een instermentaole versie te heuren. Veur die versie zorgde Serge Epskamp van Zaandhuzen. Casco Songs Studio uut Zaandhuzen zorgde veur de opnaemen en mastering van de cd. De teksten in et mediaboekien bin schreven deur Henk Bloemhoff, veur et fotowark zorgden Lenus van der Broek en Sietske Bloemhoff. De vormgeving was in hanen van Alain ter Schuur uut Wolvege. De cd is alliend te koop bi’j de Stellingwarver Schrieversronte in Berkoop. De oplaoge is 500 stoks, de cd kost € 10,00.

Bron: Stichting Stellingwarver Schrieversronte