Reprize fan Heimwee nei Hurdegaryp

Heimwee nei  Hurdegaryp wurdt reprisearre! Tryater hat yn it kommende seizoen twawiken frijmakke foar it stik dat de ôfrûne wike mei in protte sukses op Oerol stie. It publyk moat noch al even geduld ha: fan 21 jannewaris 2014 ôf is ‘Heimwee’ noch 10 kear te sjen yn ús eigen gebou. Kaarten binne fan moandei ôf te bestellen opwww.tryater.nl. De kapasiteit is beheind.
Lês mear…

‘Oerlis oer stavering nedich’

It Skriuwersboun ropt de Provinsje Fryslân op ta in werberied oer it beslút oangeande de staveringsferoaring, de standertwurdlist en de staveringshifker. It boun wol graach mei skriuwers en oare saakkundigen mei de provinsje om tafel om oer de stavering te oerlizzen. It Skriuwersboun hat hjiroer in brief skreaun oan de provinsje en de Fryske Akademy.

No freed hâldt de Provinsje in algemiene gearkomste oer de staveringskwestje yn it gebou fan de Fryske Akademy.

It Skriuwersboun docht ek in suggestje foar in tuskenoplossing. De organisaasje stelt út om de nije staveringshifker earst te foljen mei de âlde wurdlist, of dy fan it hânwurdboek, sadat de staveringshifker daliks brûkt wurde kin.

Boarne: Omrop Fryslân

Grut Frysk Diktee yn Grins

Skanomodu hâldt freed 14 juny in Grut Frysk Diktee. De stúdzjeferiening foar Fryske taal en kultuer oan de Ryksuniversiteit yn Grins hat de Switserske Amsterdammer Rob du Jardin frege om it te skriuwen. It diktee hat as tema De striid fan de Geeffryske Mienskip. Yn de sjuery sit ûnder oare dr. Willem Visser, dosint Fryske taalkunde oan de RUG en taalkundige oan de Fryske Akademy. Dielnimmers kinne har opjaan troch te mailen nei skanomail@skanomodu.nl.

Boarne: Omrop Fryslân

Hokker taal prate jo?

De (memme)taal is fan belang yn soarchsituaasjes, draacht by oan it wolwêzen fan soarchfregers en soarget foar in better begryp oer en wer. Dat binne de wichtichste konklúzjes út it ferkennende ûndersyk ‘Hokker taal prate jo?’ dat it ôfrûne healjier útfierd is yn opdracht fan de Afûk yn gearwurking mei ROC Friese Poort en ROC Friesland College. Op moandei 10 juny binne de resultaten presintearre op in byienkomst by ROC Friese Poort yn Ljouwert.
Lês mear…

Diskusjejûn staveringsferoaring

It Skriuwersboun organisearret in diskusjejûn oer de staveringsferoaring.

De jûn sil wêze op freed 7 juny 2013 om 20.00 oere yn Kafee Wouters, Sophialeane 5 Ljouwert. De Provinsje Fryslân en de Fryske Akademy ha plannen foar in staveringsferoaring, in standertwurdlist en in staveringshifker. Foar- en tsjinstanners kinne deroer redendiele. De ûndertekeners fan de oprop oan de Steaten binne ek útnoege. Hja binne fan betinken dat de plannen net trochset wurde moatte.

Nei de diskusjejûn sil It Skriuwersboun ta in stânpunt komme.

Sjoch foar ynformaasje www.skriuwersboun.nl

Boarne: It Nijs

It is mei sizzen net te dwaan

It deistich bestjoer fan it EBLT hat yn ferbân mei de behanneling fan de Wet Gebruik Friese taal in stik skreaun wêryn’t opmerkings en oanbefelings neamd wurde as ferfolch op de Taalwet. It stik is stjoerd nei de keamerfraksjes en minister Plasterk. Klik hjir om it stik te lêzen.

Jûn is de behanneling fan de Taalwet yn de Twadde Keamer. Kinne jo net yn Den Haach komme om it te folgjen? Op de webside fan de Keamer is in livestream.

Mei nei Twadde Keamer foar Taalwet?

Der sil hjoed in bus út Fryslân wei nei De Haach ride om syn reizgers yn de gelegenheid te stellen de behanneling yn de Twadde Keamer fan de Taalwet mei in stikmannich Steateleden by te wenjen. Der is noch plak! Minsken dy’t ek mei wolle, moatte harren jûn of moarnier betiid opjaan by Nynke van Dijk fan de Steategriffy:

mail n.vandijk@fryslan.nl; telefoan 058-2925906

Gearkomme om 15:45 oere foar it Provinsjehûs

As jo mei wolle, moatte jo net ferjitte in identiteitsbewiis mei te nimmen om it gebou fan de Twadde Keamer ynkomme te kinnen. Opstappe kin, oars as yn Ljouwert, ek noch yn Surch.

Boarne: It Nijs

Taalwet woansdei yn Keamer

De Twadde Keamer praat woansdeitejûn om 20.15 oere oer de ‘Wet gebruik Friese taal’. De wet regelet de posysje fan it Frysk as twadde rykstaal en befestiget dat Friezen yn Fryslân altyd it Frysk brûke meie by de oerheid en de rjochtbank. It giet om in wetsfoarstel fan âld-minister Donner, dat no troch syn opfolger Plasterk ferdigene wurde sil.

De wet regelet net de posysje fan it Frysk yn it ûnderwiis en yn de media. Guon politike partijen hawwe dêrom al oankundige dat se omtinken freegje sille foar de posysje fan Omrop Fryslân.

De posysje fan de omrop komt de kommende jierren mooglik fierder ûnder druk te stean as der op ‘e nij miljoenen besunige wurde moatte troch de publike omroppen. De Twadde Keamer frege steatssiktaris Dekker earder al rekken te hâlden mei de bysûndere posysje fan de iennichste Frysktalige omrop.

 

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40  Scroll to top