Prozabundel Nedersakisch verschenen: bloemlezing van nao W.O. II

Op zaoterdagmiddag 15 november verscheen de ni’je bloemlezing ‘Gloepends mooie verhalen uit Stellingwerf, Groningen, Drenthe, Salland & Land van Vollenhove, Twente, Achterhoek en de Veluwe’. Dat is, kotomme, een boek mit prozateksten uut de zeuven streektaelregio’s van et Nedersaksische taelgebied. In die regio’s hadden deskundige selekteerders een eerste keuze maekt uut wark van nao de oorlog, en naotied het een redaktie van weer aandere deskundigen van elke regio drie verhaelen anwezen die in de bloemlezing kwammen. Dat weren: Gees Bartels, Annet Timmer en Eric van Oosterhout, anvuld mit Baukje Bloemert van Stichting Het Drentse Boek. Die stichting het dit projekt uutvoerd en dus et boek ok uutgeven. De Nedersaksische koepelorgenisaosie Stichting SONT was de opdrachtgever.

SONT en Drentse Boek vienen et belangriek om now en dan goed wark in et Nedersaksisch uut alle regio’s te prissenteren. Ze willen meensken in de kunde kommen laoten mit wark uut ere regio’s, ze zien laoten wat d’r zoal an goed wark schreven is, ze willen ok zien laoten dat d’r een goeie Nedersaksische literetuur bestaot en ok vullen ze zo as et waore et Haandboek Nedersaksisch an. Dat boek is wel beheurlik uutvoerig over taelkunde en literetuur, mar et kon mar een klein tal teksten opnemen om die literetuur te illestreren. Et ni’je boek lat wark van 26 Nedersaksische schrievers zien, is 112 bladzieden, gelt € 12,50 en kost as e-boek een dikke negen euro.

Uut Stellingwarf is wark van Jouk (ps. van M. Bakker), Lamkje Hof-de Boer en Johan Veenstra opneumen. Selekteerder veur Stellingwarf was Peter Riksma. Et boek wodde uutgeven as ko-produktie van SONT en Drentse boek, en is bi’j Drentse boek te koop. Ok de streektaelinstituten in de regio’s hebben mitwarkt, en daor is de pepieren versie ok te koop. Et Planten Fonds, Stichting Sasland en SONT hulpen mit centeraosie.

De prissentaosie was in de twiede helte van de middag dat de Stichting Nederlandse Dialecten een streektaelkonfereensie hul in Hoogevene, in de biebeltheek daore. Annet Westerdijk, vice-veurzitter van SONT, benaodrokte dat heur orgenisaosie et van belang vint om naost de stried veur erkenning onder diel III now en dan goed ommedaenken te geven an et regio-overkoepelende belang, zoas ok et veuruuthelpen van kennis en inzicht in schrieveri’je van doe en now. SONT wol dus mar al te graeg disse bundel, en was slim bliede mit de inzet van ieder in dit projekt.

Vice-veurzitter Westerdijk overhaandigde et eerste exemplaor an Veronique De Tier, veurzitter van de Stichting Nederlandse Dialecten, warkzem an de universiteit van Gent en toegelieke ok doende as streektaelfunktionaoris Zeeuws. Die antwoordde uteraord mit een toepasselik woord. Eerder hadde Eric van Oosterhout, lid van de redaktie en in et daegelikse leven borgemeister van de gemiente Aa en Hunze, ien en aander verteld over de warkwieze van de selekteerders en van de redaktie. Hi’j hul een pleidooi veur goed ommegaon mit de streektael, benaodrokte de weerde en meugelikheden van meertaelighied en nuumde nog dat et een goed ding wezen zol as Den Haag, in et biezunder minister Plasterk, now es een keer over de brogge komt mit die erkenning diel III. Siktaoris van SONT Henk Bloemhoff zette mit naeme de mitwarkers van Drentse Boek Hermien Haar en Baukje Bloemert nog even in et zunnegien. Want et hadde al mit al een boel wark west, alles was mooi op ‘e tied klaor kommen en de prissentaosie leup ok meraokels.

Tekst: Henk Bloemhoff

Foto’s:

Baukje Bloemert van Drentse boek sprekt de geneudigden en pebliek toe. Zi'j was uutvoerder van et Nedersaksisch prozaprojekt (SONT / Drentse Boek). Foto: Jan Haveman

Viceveurzitter Annet Westerdijk bödt et eerste exemplaor an; Vrouw Veronique De Tier, veurzitter van Stichting Nederlandse Dialecten nam et an en reageerde vanzels. Foto: Jan Haveman

Reagearje

Your email address will not be published. Please enter your name, email and a comment.