Nao het succes van de eerste veer ofleveringen van de Drentstaolige podcast Praot Drents met mij komt streektaolorganisatie Huus van de Taol en regionale umroep RTV Drenthe nou met een tweide serie. Dizze maol bint er gien veer, maor elf ofleveringen opnummen.
In Praot Drents met mij prat Renate Snoeijing (directeur van het Huus van de Taol) met gasten die in Drenthe geboren of getogen bint. Hoe bint ze daordeur vörmd? En wat doet ze vandaag de dag nog met de Drentse taol? En wat döt de taol met heur?
De eerste gast in dizze neie serie is Nobelprieswinnaar Prof. Dr. Ben Feringa. Hie mag dan de hiele dag Engels praoten met zien internationale studenten op de Rijksuniversiteit in Grunning, het Drents is e nog lang niet verleerd! Feringa: ‘Op het moment dat ik de Hondsrug op rie naor Emmen hen, dan zet ik altied de Piratenzender an, dan heur ik al hiel veul Drents. Dan vuil ik mie geliek weer thuus.’
Aandere gasten bint undermeer schriefster Ria Westerhuis, undernimmer Peter van Dijk, zanger René Karst en radiomaker Bert Haandrikman.
Vanof woensdag 1 september is der alle week een neie oflevering te belustern: https://rtvdrenthe.nl/praotdrentsmetmij/podcast
Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert. RTV Drenthe is, as betrouwbare en onafhankelijke informatiebron, de spil in de Drentse samenleving.
