Tag: Huus van de Taol

Posted on

Sukelao(gie) is Lekkerste Drentse Woord

Streektaolorganisatie het Huus van de Taol hef in samenwarking met RTV Drenthe dit jaor naor het lekkerste Drentse woord in oeze streektaol zöcht. Nao een inzendronde en een stemronde is nou de winnaar bekend. Nao een spannende verkiezingsweek bleek sukelao(gie) net vier stemmen meer as gloepends te hebben.

Een greep oet alle inzendingen van dit jaor:  dreuge worst, siepelsoep, smokkie, knieperties, kloetenborrel, slik, kruusdoorns, proemenkreuze, hassebassie, sneiballegie, kleistern en snuupie.

Zowat 800 stemmen kwamen der binnen op de top 5 van het lekkerste Drentse woord, waorbij bleek dat stemmers niet allent in Drenthe woont. Der kwamen ok veul stemmen oet aandere Nederlaandse previncies en zölfs oet Duutslaand, Zwitserlaand en Australië.

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers waardeert

Posted on

Bin ie de mieste loze Drent ? Geef je dan nou op veur kennisquiz LOOS en win de 11e editie!

Wel wordt de miest loze Drent van 2025? Dat wordt dit jaor weer dudelijk in LOOS, dé kennisquiz over Drenthe waorin underwarpen as de Drentse streektaol, topografie, geschiedenis en actualiteit an bod komt. Hol ie van puzzels en spellegies? Meld je dan nou an en wel wet bi’j een jaor lang de miest loze Drent.

LOOS bestiet oet meerdere rondes. In elke oflevering gaot drei dielnimmers de stried an. Vanoet de veurrondes gaot er oeteindelijk drei kandidaten naor de finale. De winnaar kreg niet allén de titel ‘Looste Drent’, maor wint ok een schiere pries.

De opnames bint op dinsdag 4, woensdag 5 en dunderdag 6 febrewaori 2025. Je huuft niet op alle aovends anwezig te weden. Doej ok met? Geef je dan veur 19 jannewaori op via het anmeldingsformulier op https://www.rtvdrenthe.nl/kijk/loos.

LOOS is een samenwarking tussen RTV Drenthe en het Huus van de Taol. Vanof 27 febrewaori wordt de kennisquiz aal warkdaogen oetzunden op TV Drenthe. De prissentatie is in haanden van Aaldert Oosterhuis.

Foto: RTV Drenthe

Het Huus van de Taol is de streektaolorganisatie die het Drents anfietert met as doel um het een taol te laoten wezen waor de gebroekers wies met bint en die de niet-gebroekers wardeert.

RTV Drenthe is, as betrouwbare en onafhankelijke informatiebron, de spil in de Drentse samenleving.

Posted on

Vief lekkerste Drentse woorden bekend, stemweek begunt

In december is streektaolorganisatie Huus van de Taol drok met de zuuktocht naor het lekkerste Drentse woord. Nao een week woorden insturen is het nou tied um te stemmen! Dat kuj doen op ien van de vief miest ingezunden woorden op www.huusvandetaol.nl/lekker.

Tot 10 december kun elkenien een woord insturen. Dat gebeurde zu’n 300 maol, met een prachtig gevarieerd risseltaot. ‘Het lekkerste woord brengt weer hiel aandere woorden op batterij,’ volgens streektaolfunctionaris Arja Olthof. ‘Naost woorden as sausemangels, zeupie en sukersunterklaosien die allemaol mit eten van doen hebt waren der ok Drenten die keuzen veur lekker klinkende woorden as kleistern, sneiballegie en snipsnaorderijen.’

Het gung dus veul um eten bij de inzendingen die dit jaor binnenkwamen, dat is ok te zien an de top vief. In willekeurige volgorde bint dit de vief miest genuumde woorden:

Gloepends – wordt veural gebruukt um een bosschup wat kracht bij te zetten. Ie kunt gloepends bliede wezen, dan bi’j slim of hiel arg bliede.

Slik – wij zegt nou vaak snuup, maor dizze lekkernij het toch echt ‘slik’ in het Drents.

Dreuge worst – daor huuj gien extra uutleg an te wieden, nietwaor? Allent dat dit het ienige in de liest is dat oet twei woorden bestiet.

Kniepertie(s) – ok dizze sprek veur zichzölf. Knieperties bint de platte koekies die vaak in dizze tied eten wordt.

Sukelao(gie) – naost dat het woord gloepends lekker klinkt vindt veul lu het ok een lekkernij die aj niet liggen laoten kunt.

Vanof nou tot an 18 december kuj stemmen op dizze vief woorden via huusvandetaol.nl/lekker.

Op 20 december wordt vervolgens het lekkerste Drentse woord ’s mörgens bij Radio Drenthe bekendmaakt.

Posted on

Neie kerstbundel van Marga Kool

In Een kind vinden staot olde en neie verhalen en gedichten over de periode rondum kerst

In de Theaterschuur in Linde was zundag 17 november de boekprissentatie van de neiste bundel van Marga Kool. In Een kind vinden kuj kerstverhalen en -gedichten vinden. De verhalen bint schreven in het Nederlands, de dialogen in het Drents.

We hebt der lang op wachten moeten, maor nou bint de kerstvertellings en -veurdrachten van Marga Kool in ien bundel bij mekaar bracht. De schriefster hef sinds de jaoren ’70 veul optreden. Der is lichtkaans gien dörpshoes in Drenthe te vinden waoras ze niet west is. In Een kind vinden bint niet allent de bekende verhalen, maor ok nei wark opnomen.

Het eerste exemplaar van de verhalenbundel gung in Linde naor twei vertegenwoordigers van de Vrouwen van Nu, Yvonne Sloots, veurzitter Provinciaal Bestuur Vrouwen van Nu Drenthe en Gé Algera, veurzitter van ofdeling Zuudwolde. Ze waren der slim wies met. De prissentatie weur nog feestelijker deur optredens van Leonieke Toering en Jan Roelof Bathoorn. Zij zungen liedties in streektaolen van over de hiele wereld.

V.l.n.r.: Gé Algera, schriefster Marga Kool, Yvonne Sloots. Foto: Huus van de Taol.

Een kind vinden is een prachtig leesboek veur de duustere winterdaogen. Ok is ’t een bezunder veurleesboek veur elk die aandern van de kerstsfeer wil genieten laoten.

Het boek is te koop veur € 19,50 bij de boekhandel en bij het Huus van de Taol in Beilen.

Posted on

Het Huus van de Taol brengt vacatures veur vrijwilligers veur het voetlicht

Bij streektaolorganisatie het Huus van de Taol bint ze op zuuk naor enthousiaste vrijwilligers die bijdragen wilt an het behold en de promotie van de Drentse taol.

Met een bestaonde groep van umdebij 130 vrijwilligers hebt ze al een prachtige en toegewijde club, maor ze kunt altied neie krachten gebroeken!

Daorum vrag het Huus van de Taol dizze maond extra andacht veur zien vrijwilligersvacatures. Veur veul activiteiten begunt in jannewaori namelijk de veurbereidingen veur de activiteiten in meert. Daorbij kunt ze in verscheiden gemienten zeker nog verstarking gebroeken. Veur wel een koppel uurties in de maond tied hef is vrijwilligerswark bij het Huus van de Taol een weerdevolle én leuke menier um de streektaol op de kaort te holden. Daorbij doej wat veur de taol die je nao stiet en kuj het wark in je eigen woonplaots/gemiente doen.

As iene interesse hef, kan e zuch anmelden via de website (huusvandetaol.nl/vacatures) of tillefonisch contact opnimmen veur meer informatie (0593-371010).  Oj nou graag de haanden oet de mouwen steekt bij evenementen of liever achter de scharms metwarkt – der is veur elk wat wils! Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers wardeert.

Posted on

Nei seizoen Taal an Taofel begunt met Hennie Stokker-Stadman, Johan Veenstra en Geert Jan Brader in Noord-Slien

Al meer as 25 jaor is de combinatie van Drentse schrieverij & meziek en eten geliefd. In het neie seizoen kuj op acht zundagen naor Taal an Taofel in Dwingel en Noord-Slien.

Vrijwilligers van streektaolorganisatie het Huus van de Taol bint drok gangs met de veurbereidingen van het neie seizoen van Taal an Taofel. Op acht zundagen in de winter kunt bezukers naor streektaolschrievers luustern. En ok is der altied meziek en tussen de middag waarm eten.

Taal an Taofel is aal in dezölfde zaolen: Grand Café De Brink in Dwingel en Restaurant-Zalencentrum Wielens in Noord-Slien. Op zundag 20 oktober is de oftrap in Noord-Slien. Het publiek kan luustern naor poëzie en verhaolen in de streektaol van Hennie Stokker-Stadman en Johan Veenstra. De meziek komp van Geert Jan Brader. Op 27 oktober kuj naor Dwingel. Bezukers kunt dan genieten van poëzie en verhaolen in de streektaol van Ria Westerhuis en Egbert Meijers. De meziek komp van Dorothee Spijker.

In de middagpauze kan elkenien naor het warm buffet. Taal an Taofel begunt um 11.00 uur en stopt um 14.00 uur. De entree is € 22,00. En daor kriej dan koffie/thee en een waarme maoltied veur.

In Noord-Slien is Taal an Taofel op 20 oktober, 10 november, 16 febrewaori (2025) en 16 meert (2025). Risserveren kan tot de dunderdag daorveur via reina.zwiers [apestaartje] planet.nl.

In Dwingel is Taal an Taofel op 27 oktober, 24 november, 9 febrewari (2025) en 9 meert (2025). Risserveren kan ok hier tot de dunderdag daorveur via ans.klok [apestaartje] ziggo.nl of j.oosting01 [apestaartje] home.nl

Posted on

Neie verhalenbundel Doagen en dreumdoagen van Tonko Ufkes

In de toen van de Theaterschuur in Linde weur zaoterdag 6 juli het festival ZomerGoed holden. Naost kraomen, meziek en veurdrachten was der ok een boekprissentatie. Oetgeverij Het Drentse Boek har de neiste verhalenbundel van Tonko Ufkes metnummen. Tiedens de prissentatie kreeg schriever Jan Glas het eerste exemplaar van Doagen en dreumdoagen oet haanden van Tonko Ufkes.

Jan Glas (links) kreg de eerste Doagen en dreumdoagen van schriever Tonko Ufkes. Foto: Huus van de Taol

De bundel hef 33 körte verhalen in het Westerkertiers. In Doagen en dreumdoagen bint wisselnde personen an ‘t woord. Ze gaot argens hen, komt ien tegen of herinnert zuch een biezunder veurval. Wat is waor gebeurd en wat dreumt de hoofdpersoon der zölf bij? Tonko Ufkes wet in een paor zinnen een wereld te scheppen waorin de lezer metnummen wordt.

Doagen en dreumdoagen is de twaalfde bundel van Tonko Ufkes (1958). In 2019 kreeg hij in Duutslaand de Freudenthalpreis, de belangriekste pries veur Nedersaksische literatuur.

De bundel is veur € 14,50 te koop in de webshop van het Huus van de Taol en in de boekhandel.

Posted on

Bert Eefting en Katrien Eggens neie streektaolambassadeurs veur het Huus van de Taol

Bert Eefting en Katrien Eggens bint sinds dizze week streektaolambassadeur veur het Huus van de Taol. As streektaolambassadeur zult ze der beiden met een koppel vrijwilligers veur zörgen dat er streektaolactiviteiten in heur gemiente organiseerd wordt.

Eefting volgt Geert Woldman op en giet an de slag in de gemiente Midden-Drenthe. Daor is e gien onbekende, want tot febrewaori van dit jaor was e daor  wiekagent. ‘Umda’k Drentstaolig bin, he’k daor in mien wark altied een bult veurdiel van had. Het is van belang daw de Drentse taol en cultuur uutdragen blieft.’

Eggens nemp in de gemiente Aa en Hunze het stokkie over van Jan Hartlief. Ze hef een eigen bedrief in training, coaching en interimmanagement. Ze gruide op Oringerveen op met het Drents, wat dan ok echt bij heur heurt: ‘Ik bin wies met het Drèents en vind het belangriek um het ere in te holden én um het deur te geven.’

Renate Snoeijing, directeur van het Huus van de Taol: ‘Zowal Bert as Katrien brengt een mooi netwark met. Daor kuw  in heur gemienten goed op bouwen . Maor het belangriekste is vanzölf dat ze het hart veur het Drèents op de juuste stee zitten hebt.’

Het Huus van de Taol bedankt Geert Woldman en Jan Hartlief veur alles wat ze as streektaolambassadeur daon hebt. Allebei blieft ze in de rol van streektaolvrijwilliger betrökken in heur gemiente. Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert.

Katrien Eggers. Foto: Marcel J. de Jong
Bert Eefting. Foto: Huus v.d. Taol
Posted on

Regiecursus veur Drents amateurteniel bij Huus van de Taol

Streektaolorganisatie wil neie regisseurs anfietern

Het Huus van de Taol organiseert op vief maondagaovends een körtlopende Regiecursus veur Drents teniel veur Drentse tenielgroepen en aandern. Op 9, 16, 23 en 30 september en op 7 oktober geeft Harm van Ballegooijen en Rob van der Ree les. Zij waren vrogger de tenieladviseurs van Drenthe en brengt daormet veul ervaring met um moet te putten.

De Regiecursus veur Drents teniel is der veur tenielgroepen en aandern met belangstelling veur regie. In de cursus leer ie undermeer hoe aj een stuk oetzuukt, hoe aj rollen typeren kunt en hoe aj as regisseur umgaot met tempo, ritme, licht, geluud en decor.

Verleden jaor waren der al een paor aovends west, um de vraogen van de tenielverienigings en -speulers op de rieg te kriegen. Wat bleek? Ze wilt geern een regiecursus volgen, umreden dat der veul te weinig regisseurs bint.

De kosten veur de vief aovends bint € 50,- de dielnimmer. De cursus is bij het Huus van de Taol an het Raadhuisplein in Beilen. Het Huus van de Taol wil zo Drents teniel anfietern. Anmelden veur de cursus kan via huusvandetaol.nl/regiecursus-Drents-teniel.

Posted on

Streektaal in de zorg: het geneest niet, maar voelt wel beter! 

In het kader van de Dag van de Zorg vragen de Nedersaksische taalorganisaties aandacht voor streektaal in de zorg. Want veel mensen, zeker ouderen, in noordoost-Nederland spreken nog een Nedersaksische streektaal. Hoe fijn is het als zij in hun eigen taal worden aangesproken? Dat voelt vertrouwd! Daarom ontwikkelen Erfgoedcentrum Achterhoek en Liemers, Overijsselacademie, het Huus van de Taol, Centrum Groningse Taal en Cultuur en Stellingwarver Schrieversronte mooie projecten om het gebruik van streektaal in de zorg te stimuleren.  

Op zondag 12 mei is het de Dag van de Zorg. Op deze dag, de verjaardag van de wereldberoemde Engelse verpleegster Florence Nightingale, worden alle medewerkers in de zorg in het zonnetje gezet. En dat verdienen ze ook, want ze doen fantastisch werk. Wat heeft streektaal dan met zorg te maken? Veel! Want voor mensen die zorg nodig hebben en die van nature een streektaal spreken, is het heel fijn als ze ook echt in die streektaal worden aangesproken. Dat breekt het ijs en schept een band: het voelt voor hen vertrouwd.

 Mooie projecten

De Nedersaksische taalorganisaties in Nederland erkennen het belang van streektaal in de zorg. Zij werken aan mooie initiatieven om ervoor te zorgen dat het Nedersaksisch weer vaker klinkt in het verzorgings- of ziekenhuis, de thuiszorg, bij de dokter en op andere plekken waar zorg wordt verleend en ontvangen. Een mooi voorbeeld is het zorgzakboekje, een handige vertaalgids voor verzorgenden die hun cliënten in het Nedersaksisch willen aanspreken. Het zorgzakboekje is inmiddels in het Achterhoeks en Twents uitgebracht, de Drentse versie wordt donderdag 16 mei gepresenteerd en de Veluwse variant wordt op donderdag 23 mei geïntroduceerd.

Lao’w ’s plat praoten!

Een mooi vervolg op het zorgzakboekje zijn de gesprekskaarten ‘Lao’w ’s plat praoten’ die Erfgoedcentrum Achterhoek en Liemers heeft ontwikkeld. Dit zijn 20 kaarten met allerhande ‘vraogen um in ’t Achterhooks an de praot te kommen’. De kaarten zijn voorzien van bijpassende, authentieke Achterhoekse foto’s en bieden mooie gespreksstof in het Nedersaksisch. In Drenthe, Overijssel en Gelderland worden er ook lessen streektaal gegeven op (zorg)opleidingen en vrijwilligers van het Huus van de Taol gaan regelmatig op pad om in het Drents voor te lezen in verzorgingshuizen.  

Aandacht waard

Prachtige initiatieven die ertoe leiden dat er weer meer streektaal wordt gesproken in de zorg. De meeste van de initiatieven zijn tegen een relatief kleine vergoeding of zelfs kosteloos aan te vragen door (zorg)instellingen.