Tag: Stichting Het Drentse Boek

Posted on

Huus van de Taol komp met schriefwedstried met 45 as thema

In 2025 viert oetgeverij Het Drentse boek heur 45e verjaordag. Streektaolorganisatie het Huus van de Taol organiseert daorum een schriefwedstried veur elkenien die het Drents in de pen hef. Der bint twee categorieën waorin mèensen metan doen kunt, poëzie en proza. Binnen elke categorie bint der twee ofdielings:

  • schrievers die al een boek bij een reguliere oetgeverij publiceerd hebt
  • schrievers die nog gien boek /een boek in eigen beheer oetbracht hebt.

In totaal bint er dus veer priezen te verdielen. De heufdpries is € 100,-.

Thema: 45

Het getal 45 stiet dit jaor in de schienwarpers. As schriever muj zölf weten op wat veur menier je het getal broekt. Van 1945 tot hoesnummer 45, een 45e verjaordag, hunebed 45, 45 euro, of wat dan ok. Het jaortal 1945 lig allicht veur de haand, mar let op: de jury beoordielt ok op originaliteit.

De mooiste verhalen en gedichten komt op de ‘lange liest’ en wordt opnummen in een boek. De winnende inzendings kriegt er nog een extra podium bij: publicatie in tiedschrift Zinnig. Een deskundige jury beoordielt alle inzendings anoniem. Pas as de winnende gedichten en verhalen bekend bint, wordt de namen van de schrievers an de jury onthuld.

Spelregels

  • schrief in ien van de varianten van het Drents (de jury kek naor inhold, niet naor spelling)
  • je inzending is origineel en niet eerder publiceerd
  • verhalen telt maximaol 1400 woorden
  • inzendings moet 6 oktober 2025 binnen weden:
    • info@huusvandetaol.nl
    • zet in de underwarpbalk: schriefwedstried
    • verstuur het verhaal/gedicht as bijlage (niet in de mail zölf)
  • zet boven je inzending oj al dan niet publiceerd hebt bij een reguliere oetgeverij
  • per dielnimmer maximaol ien verhaal en ien gedicht

Kiek ok op: https://huusvandetaol.nl/45hdb/

Posted on

Boekprissentatie Anne Doornbos op Bunerveen … en een vermissing tiedens de jacht

In een gemoedelijke sfeer was op vrijdag 16 mei de boekprissentatie van Het offer an de paol, de neiste Drentstaolige thriller van schriever Anne Doornbos. De prissentatie weur holden in dörpshoes De Viersprong op Bunerveen. Het eerste exemplaar was veur Erwin Slomp van ‘t Hollandscheveld, teamchef basisteam Zuudwest Drenthe bij Politie Noord Nederland.

Het eerste exemplaar was veur Erwin Slomp van ‘t Hollandscheveld (links). Rechts: Anne Doornbos. Foto: Huus van de Taol

Familie, vrienden en collega-schrievers waren anwezig um te lustern naor de eerste fragmenten oet het spannende boek. Bert Hadders was der um toepasselijke liedties over moorden te zingen. Hadders is zes kilometer wiederop in Twaide Mond opgruid en har zo maor in de neiste thriller van Doornbos staon kunt. De schriever laot geregeld bekende Drenten een rol in zien boek speulen, vaok under een andere naam.

Het offer an de paol is het veerde verhaol van het Inspecteur Rossing-dossier. In 2018 verscheen de eerste Drentse thriller van Anne Doornbos bij Het Drentse Boek, De Paddenvanger. Daornao schreef e De man die Russisch preut en Grafgift. Doornbos nemp de lezer tiedens de zuuktocht van inspecteur Rossing met deur het Drentse landschap, dat altijd een prominente rol speult in zien verhaolen. In Het offer an de paol is dat niet aans:

Een dikke boer oet Bunerveen is vermist. Was e op jacht en is der wat gebeurd? Hef zien inzet veur windmeulens in De Monden hum opbreuken? Of hef zien verdwiening te maken met een aal wieder oplopende ruzie over lelieteelt? Zien gezin blef vertwiefeld achter.

boek signeren

In juni zal de schriever deur de provincie trekken um zien boek te signeren.

  • Zaterdag 7 juni: ’s mörgens bij de Readshop in Coevern, ’s middags bij boekhandel Vermeer in Emmen
  • Zaterdag 14 juni: ’s mörgens bij boekhandel Daan Nijman in Roon, ’s middags bij boekhandel Van der Velde in Assen

Het offer an de paol is veur € 19,95 te koop bij de betere boekhandel en via de webshop van het Huus van de Taol (huusvandetaol.nl/webshop)

Posted on

Roman ‘De Affaire’ over macht, seks en intrige in de Drentse politiek.

Het verhaol is inspireerd op een waorgebeurd schandaal dat al meer as tien jaor de Drentse politieke gemoedern bezigholdt.

Een journalist die blind carrière prebeert te maken, twei vrouwelijke politici die mekaar de tent oetvecht en een subsidiefraude van jewelste, dat bint de explosieve ingrediënten van dizze körte roman.

De titel slat zowal op het fraudeschandaal as op de escapade van een journalist die geheime stukken over de fraude toespeuld kreg. Met informatie die hij via het bedde verkreg, mak een journalist rap naam en der lonkt grote roem. Maor hij stek zich ok in een wespennust van macht, seks en intrige. Allewal e alles op het spel zet lek der gien ontsnappen meer an. Of is er toch nog een oetweg oet dizze zaak?

Het boek is schreven deur Tieme Woldman en vörmgeven deur Wouter van Tilborg. Op vrijdag 12 november 2021 wordt het eerste exemplaar in ontvangst nummen. En vanof dan is het boek in de boekhandel en op huusvandetaol.nl te koop.

Posted on

Jannie Boerema vertaolt en bewarkt Shakespeares Macbeth tot Macbeth in Drenthe

Drentse Shakespeare wordt in beparkte oplage oetgeven deur Het Drentse Boek 

ZEIJEN – In heur woonplaots Zeijen prissenteerde schriefster Jannie Boerema samen met oetgeverij Het Drentse Boek heur vertaoling van de tenieltekst Macbeth van William Shakespeare. Boerema verplaotst dit stuk van Schotland naor Drenthe. Heur bewarking hef dan ok de naam Macbeth in Drenthe.

Op dunderdag 9 september zit zu’n 30 mèensen in de grote zaol van café Hingstman. Twei doedelzakspeulers van ClanMacbeth oet Grunnen komt met het eerste exemplaor de zaol in. De schriefster gef dit boek dan an Marga Kool.

links Jannie Boerema en rechts Marga Kool

Shakespeares Macbeth is een mix van hoogdraovend en platvoers teniel, van olde thema’s en neie ideeën. Jannie Boerema hef een frisse Macbeth in Drenthe maoken wild, zunder daorbij de taol en inhold van het originele stuk kwiet te raken. Ze verplaotst de stried um de macht naor Drenthe. En gek genog is het hielemaol niet vrömd dat der edeln in de previncie rondloopt en dat der een koning vermoord wordt. Of dat der internet en Spa Rood is.

Oetgeverij Het Drentse Boek gef miest poëzie en proza in boekvörm oet. Veur Macbeth in Drenthe, feitelijk een tenieltekst, is der een oetzundering maakt. De vertaoling van Jannie Boerema is zó biezunder dat er geliek een luxe editie van maakt is met harde linnen kaft. Daorbij wordt dit boek in een beparkte oplage van 50 exemplaoren in de Linksum-reeks oetbracht. De schriefster hef ze nummerd en signeerd. Het boek komp der ok as e-book, te bestellen.

Posted on

Nei boek Tonko Ufkes: De weg dreumen

Oetgeverij Het Drentse Boek van het Huus van de Taol hef op 29 april de verhalenbundel De weg dreumen van de Grunneger schriever Tonko Ufkes prissenteerd. In 2015 kwam ok al een boek van Ufkes oet bij de Drentse oetgeverij.

Achter de Coendersborg in Nuis hej een mooi beschut terras. Hier mus het gebeuren met een klein groepie, allen femilie en vrienden. De boekprissentasie gung aans. Het regende helderop en dus stun Tonko dreug in de muziekkoepel en de gasten met paraplu’s in de tuun van de Coendersborg. Het wur een bezundre boekpresentasie. Tonko Ufkes gaf de eerste exemplaren van De weg dreumen an Marleen Diepeveen, Melle Hijlkema en Baukje Bloemert.

Grunneger Tonko Ufkes is verhalenverteller. Dat döt hij al heel lang en altied in de taal van de streek waor hij geboren is, het Westerkwartiers. In zien neie verhalenbundel De weg dreumen lat Ufkes zien dat hij as schriever niet stil is blieven staon. Tonko Ufkes schref veurnamelijk verhalen. Tot veur kort waren die verhalen kört en keus de schriever onderwarpen die zich daorveur leenden; vaak met een wat weemoedige inslag en een onderliggend verlangen naor (fysiek) contact. Maor in zien neie bundel hef Tonko Ufkes deels minder bekende paden keuzen. Der bint langere verhalen in te vinden, en ok de onderwarpen bint gevarieerder. Zien liefde veur de zee en veugels is hij niet kwiet, en een zekere fascinatie veur vrouwen evenmin. Mar daornaost lat hij zien dat hij ok weg wet mit een speulse maniere van een echt toneelstuk, of een quasi vraog en antwoordverhaal.
Met De weg dreumen hef Tonko Ufkes zien vaste plek in de noordelijke schrieverswereld bewezen.


De weg dreumen is te koop in de boekhandel en op de webshop van het Huus van de Taol veur € 12,50. De vörmgeving van het boek is daon deur Wouter van Tilborg.

Posted on

Veurnaem boek over de Drentse schrieveri’je: ‘Waor roet en onkruud wortel schiet in ’t veld’

provinciehuis02Vri’jdag 13-5-2016 wodde in et Drentse perveensiehuus dr. Henk Nijkeuter zien vervolg op de Geschiedenis van de Drentse literatuur, 1816-1956 prissenteerd. Et is aldereerst veur geïnteresseerden in de eigen Drentse literetuur van groot belang, mar ok de naobers mit interesse kun netuurlik mooie info vienen. Stellingwarver schrievers bi’jglieks hadden in de beschreven tied riegelmaotig literaire kontakten over de Drentse greens. Et boek omvaemt dik 500 blz. en ok daoromme is et veural een naoslagwark. Et beschrift de tied van nao WO II, mit as eerste onderwarpen de pesisie van streektaelliteretuur, de literaire kritiek en de literetuurgeschiedschrieving nao 1945. Dan komt de tiedrekte van 1947 tot 1979 in ’t volle locht. In 1947 zette et bekende Drents genootschop uut aende, en daor kwam ok de emaansipaosie van de Drentse schrieveri’je mit op glee. In 1956 wodde et streektaeltiedschrift ‘Oeze Volk’ opricht. Van stonde of an kwammen d’r meer boeken in et Drents. De schrievers wollen daor ok heur overtuging mit uutdregen. In perf. Hendrik Entjes zien ogen was et gebruuk van streektael doe om zien te laoten dat die tael wardering verdiende (lezing, 1966). In 1979 ontston et tiedschrift ‘Roet’. Dat rekende of mit ‘et oolde’ en was uut op echte literetuur. De alderlaeste jaoren kuj’ bepaold zien dat de Drentse literetuur leeft, neffens Nijkeuter.

Dippeteerde Henk Jumelet kreeg et eerste exemplaor uut hanen van Anne Doornbos, veurzitter van et ‘Huus van de Taol’. De perveensie bleek de komst van et boek ommeraek te warderen; Jumelet zee o.e. dat Drenthe behalven ‘et Huus’ ok aander wark veur et Drents beslist ondersteunen blieven zal. Hooglerer Friese tael- en letterkunde Goffe Jensma gaf vervolgens zien prakkesaosies over et boek in ’t verbaand van ‘kleine litereturen’. ‘Het Drentse boek’ is de uutgever; pries: € 29,50.

Posted on

Neie uutgave Het Drentse Boek n tuut op beide schelpen

De presentatie van de nieuwe verhalenbundel van Tonko Ufkes, uitgegeven door Stichting Het Drentse Boek uit Beilen, gebeurde in het Huis van de Groninger Cultuur. De reden daarvoor is dat het Westerkwartiers, de taal waarin Ufkes schrijft, veel raakvlakken kent met zowel het Drents als het Gronings, en zelfs ook met het Stellingwerfs en Fries. Het is een typische grensregio. Dat betekent dat veel lezers die een van de streektalen machtig zijn, herkenning vinden in de taal van schrijver Ufkes. Het eerste exemplaar werd overhandigd aan collegaschrijver Melle Hijlkema. Het Westerkwartiers mag dan een klein taalgebied zijn, actief is men er wel.

Ufkes gaf al eerder vijf poëziebundels uit en een verhalenbundel. Zijn verhalen hebben een eigen kleur, zijn duidelijk herkenbaar van zijn hand. Ook de thema’s en verwerking daarvan zijn karakteristiek voor het proza van Tonko Ufkes. In n tuut op beide schelpen vertellen zijn verhalen over sterke mensen die in kwetsbare situaties terecht zijn gekomen. Liefde en lichamelijkheid, natuur en de stad, zijn passie voor het Wad en vogels, alles komt samen in deze nieuwe bundel. Verhalen die verrassen, amuseren en tot nadenken stemmen. Verhalen die door het Westerkwartiers een extra dimensie krijgen. Continue reading “Neie uutgave Het Drentse Boek n tuut op beide schelpen”

Posted on

Kaansen en meugelijkheden streektaolschrieverij

Hef de streektaolschrieverij een tooukomst? Dat is een goeie vraog op het moment dat grote booukwinkels failliet gaon en de verkoop van boouken overaal teruglop. Is der nog wel een markt veur streektaolschrieverij? Hoou komp een streektaolschriever an lezers en an optredens? Hoou kan e de kwaliteit van zien wark verbetern? Zuk soort vraogen kommen an de order op de negende Internationale Streektaolconferentie op 15 november in de Openbare Bibliotheek in Hoogeveen.

De Stichting Nederlandse Dialecten organiseert in samenwerking met het Huus van de Taol, Bureau Groninger Taal en Cultuur en de IJsselacademie een streektaalconferentie veur schrievers, oetgevers, redacteuren en veur alle geïnteresseerde streektaollezers. Continue reading “Kaansen en meugelijkheden streektaolschrieverij”