Tag: Drents

Posted on

Met Egbert Hovenkamp II kuiern deur Eext

Zundagmiddag 21 mei Egbert Hovenkamp II-lezing met meziek van Bert Hadders en anslutende wandeling in Eext

Het Huus van de Taol organiseert saomen met underweg.eu een middag met de schriever Egbert Hovenkamp II. In zien tekst Ergo Eext Echo vertelt de taolwever over zien kinderjaoren in Eext. De schoel met mister Dorus, de melkfabriek De Eendracht, bakker Udding, krudenier Westerhof en café de Rustende Jager komt veurbij. En ok de joints tussen de stienen van hunebed D14. Wat is der overbleven? Kuw nog een echo vinden in Eext? Saomen gaow met je op zuuk op zundag 21 mei tiedens de Egbert Hovenkamp II-lezing.

Wij leest, kuiert en luustert met oeze gasten: Egbert Hovenkamp II en Bert Hadders en kuiert van de kark hen Dorpsmuseum de Kluis. 

Welkom

Publiek is van harte welkom bij dizze middag. Aanvang: 14.00 uur Hervormde kark, Kloosterstraat 2, Eext. De entree is € 7,50. Kaorten kunt risserveerd worden via https://huusvandetaol.nl/product/egbert-hovenkamp-lezing/

Posted on

Prieswinnaars Wiesneus 2023 bint bekend

Kleurplaoten en puzzels oet het streektaoltiedschrift levert 5 winnaars mooie priezen op

Vleden meertmaond is bij het veurleesproject van streektaolorganisatie Huus van de Taol tiedschrift Wiesneus weer naor de basisschoelen bracht. Zo kunden kinder in Drenthe zuch vernuvern met Drentse verhaolen, gedichten, puzzels en ok een kleurplaot. Oet de inzendingen van de kleurplaot en oplössingen van de puzzels hef de jury de winnaars keuzen.

winnaars
De woordzuker har as oetkomst de zin ‘Is streektaal praoten een kuunst’. De pries veur de goeie oplössing giet naor Meira Westerveen van basisschoel De Eskampen oet Paais.

De diagrampuzzel har as oetkomst ‘varfdeuze’. Dat wus Kaj Sok oet Nijevene ok, daorveur kreg ok hij een mooie pries. Veur de kleurplaot hef de jury drei winnaars keuzen: Eva Gils van De Eshorst in Beilen, Hugo Pekelder van de Eshoek in Annen en Tina oet groep 8 van De Weidebloem in Hoogeveen hebt met heur kunsten een pries wunnen. Prieswinnaars kriegt via de schoel bericht.

Digitaal is alles over het tiedschrift ok te vinden op www.wiesneus.nl, op dizze website kan het hiele jaor deur speulenderwies Drents leerd worden.

Wiesneus 2021

Huus van de Taol
HetHuus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers wardeert.

Posted on

Yvonne Cornax en Jos Kasten nei in bestuur Huus van de Taol

Yvonne Cornax en Jos Kasten bint toetreden tot het bestuur van Stichting Huus van de Taol in Beilen.

Cornax warkt as marketingstrateeg bij Marketing Drenthe. As kind van een Friese mamme en een Grunningse pappe gruide ze op in Overiessel, studeerde ze in Braobant en Gelderlaand en nou woont ze al dartien jaor in Paais: ‘Ik kan Fries, Gronings, Drents, Sallands en Brabants verstaan, maar mijn dialect is een gekke mengelmoes van al die talen’.

Kasten woont in Beilen en warkt as bedriefsadviseur. Op dit moment is ze undermeer directeur-bestuurder bij stichting ToReCo (Toeristisch Recrecatief Coevorden): ‘Graag werk ik als bestuurslid mee aan het behoud van onze streektaal, dat zo van invloed is op onze Drentse cultuur’.

foto Jos Kasten (l): Renske Klewerwal Fotografie; foto Yvonne Cornax (r): Tim van der Kuip (Bureau Apart)

Renate Snoeijing, directeur van het Huus van de Taol: ‘De kennis en ervaring van dizze beide vrouwlu kuw goed gebruken bij het Huus van de Taol. Wij bint er dan ok wies met dat ze ja zegd hebt tegen een bestuursfunctie bij oes’.

Bestuurslid Gezienes Evenhuis oet Emmen hef nao acht jaor zien functie as bestuurder neerlegd. Het Huus van de Taol wil hum stief bedanken veur alles wat e veur de streektaolorganisatie daon hef.

Huus van de Taol
Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert.

Posted on

U.D.I. Runerwold wint Drents ienakterfestival Kört&Goed

In theater De Tamboer in Hoogeveen hef rederiekerskamer U.D.I. oet Runerwold op zaoterdag 1 april het ienakterfestival van streektaolorganisatie Huus van de Taol wunnen. De tenielgroep voerde het stuk ‘Viefsterrensafari’ op. Dit is een nei stuk schreven deur Marianne Braam. In 2020 hef het Huus van de Taol een cursus ienaktersschrieven had. Met groot succes, der bint zu’n tien neie ienakters schreven. Marianne Braam hef ‘Viefsterrensafari’ tiedens deze cursus schreven.

In theater De Tamboer in Hoogeveen kreeg het pebliek zaoterdagaovend een vol pergramma te zien. ‘De Wichter oet Vrèeis’ stunden op de plaanken met een zölfgeschreven stuk en theatergroep ‘Plat op Pad’ oet Nei-Moscou speulde de klassieker ‘Brandsma vrag een hoesholdster’. 

In de tied tussen de tenielstukken was der meziek van de zes vrouwlu van ‘Dwarzz’ oet Emmen. Nao de veurdracht van schriefster Yvonne Bijl meuk de jury de winnaar bekend. De speulers van U.D.I. oet Runerwold gungen met de eerste pries hen hoes, theaterbonnen en het bord ‘Winnaar Drents Ienakterfestival 2023’. In 2017 en 2019 stund U.D.I. ok al in de finale. Dus drie maol is scheepsrecht. Het Huus van de Taol hoopt in 2025 de viefde editie van het festival te organiseren.

Speulers van U.D.I. Runerwold. Foto: Huus van de Taol

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers wardeert.

Posted on

Harrie Wolters kreg eerste exemplaar van Grafgift, de neie Drentse thriller van Anne Doornbos

In de filmzaal van het Hunebedcentrum in Börger was gisteraovend de boekprissentatie van Grafgift. Een kleine vieftig man zit in de zaal. Anne Doornbos gef het eerste exemplaar an de directeur van het Hunebedcentrum, Harrie Wolters, umreden e belangriek west hef veur de inhold van Grafgift. Doornbos mag geern personages in zien boek een naam geven die an bestaonde personen linkt is. Zo hef Harrie Wolters in het boek de naam Jozef Oosting kregen.

Foto vlnr: Anne Doornbos en Harrie Wolters. Bron: Huus van de Taol

In de darde Drentse thriller oet de Inspecteur Freek Rossing-reeks vindt een gezin oet Spijkenisse under de dikke vlinten van hunebed D26 bij Drouwen het lichaam van een jonge vrouw. Zij is umringd deur diggelgoed; potties en bekers zoas het Trechterbekervolk die metgaf an heur doden. Der bint bijkaans gien sporen en Freek Rossing stiet veur ien van de grootste oetdagings oet zien loopbaan. En twei dagen later zal e met zien femilie op vekaansie.

Grafgift is een verhaal dat niet allent giet over het speurwark naor de daoder, maor ok over breuken carrières, vernedering, bezetenheid en schaamte.

Anne Doornbos (Erica, 1948) schref proza, poëzie, teniel- en liedteksten, veulal in het Drents. In 2018 verscheen zien eerste Drentstaolige thriller, De Paddenvanger, waormet e de Streektaolpries wun. In 2021 volgde een tweide thriller, De man die Russisch preut.  Grafgift hef 376 pagina’s en kost € 19,95. Het is te koop in de winkel van het Huus van de Taol in Beilen, bij de boekhandel en op www.huusvandetaol.nl/webshop

Posted on

Roel Reijntjes-lezing in restaurant Luning in Rune

Op zundagmiddag 19 meert dreit het in restaurant Luning an de Brink in Rune um het wark en leven van Roel Reijntjes. Um 14:00 begunt der een pregram van veurdrachten en een kleine rondleiding deur het dörp.

Schriever Roel Reijntjes is honderd jaor leden geboren en twintig jaor leden oet de tied kommen. Hij woonde in Beilen, maor ien van zien mooiste gedichten giet over Rune. Daorum hef de organisatie keuzen veur een Roel Reijntjes-lezing in Rune.

Literatuurkenner Henk Nijkeuter, schriever en muzikant Erik Harteveld en streektaolambassadeur Ans Klok vertelt over het leven en de schrieverij van Roel Reijntjes. Dizze lezing is de darde die heurt bij de Underweg-reeks, een neie Drentse literaire wandelserie. De schrievers hiervan, Gerrit Boer en Henk Berghuis, praot over het belang van en het idee achter de literaire wandelserie. Publiek is van harte welkom bij de Roel Reijntjes-lezing. De entree is € 7,50. Kaorten kunt risserveerd worden via www.huusvandetaol.nl/product/roel-reijntjes-lezing

Posted on

Warkwinkeldag liedtiesschrieven met Jan Tekstra!

Op 19 maart ankommen organiseert Stichting REUR een warkwinkel -liedtiesschrieven- in het kader van het Drèents Liedtiesfestival 2023. De warkwinkel zal verzörgd worden deur gienien minder as de succesvolle liedtiesschriever Jan Tekstra.

Jan schreef under aanderen de hits ‘Je hoeft niet naar huis vannacht’ en ‘Vrij Zijn’ van Marco Borsato. Veur hum schreef e ok de tekst en meziek veur de hit ‘Het Water’. In 2014 har e as tekstschriever weer een nummer 1-hit: Mooie Dag (Jay Jawson), een paar jaor later volgd deur de nummer 1-hit ‘Ze huilt maar ze lacht’ van Maan.

Wieder schreef/schrif Jan untelbare nummers veur bezunder veul Nederlaandse artiesten, waorunder Tabitha, Roxeanne Hazes, Dre Hazes JR, Merol, Herman Brood en Liesbeth List.

Drèents Liedtiesfestival

Anmelden en infermatie:

Veur dielname an de warkwinkeldag kuj je anmelden via de webstee van Stichting REUR: https://www.stichtingreur.nl/nl/dlf/workshopdag-songwriting-jan-tekstra

Kosten veur dielname bint € 20,- (incl. koffie/thee) Locatie: Podium 34, Hoofdstraat 34, 9531 AG Borger

Posted on

Streektaolstried

In aal meer dörpen in Drenthe kunt inwoners metdoen an een Streektaolstried. Dizze Drentse variant van de pubquiz is in het Drents vanzölf. In acht rondes met elke keer acht vraogen wordt je kennis van het Drents en van zaken die van doen hebt met Drenthe test. Elkenien kan metandoen aj een team van veer of vief man hebt.

Hierunder een overzicht:

  • 24 meert Het Kompas – Op De Smilde
  • 24 meert Hingstman – Zeijen
  • 29 meert MFA De Brink – Slien
  • 31 meert Markehuus – Grol
  • 31 meert Onder de Linden – Roon
  • 14 april ’t Anker – Hollaandscheveld
Foto: Huus van de Taol

Streektaolstried Midden-Drenthe

  • Vrijdag 24 meert
  • Het Kompas op De Smilde
  • Anvang: 20.00 uur (inloop vanof 19.30 uur)

Anmelden kan veur maondag 19 meert bij Geert Woldman: gwoldman @ xs4all.nl.

Streektaolstried Zeijen

  • Vrijdag 24 meert
  • Café Hingstman in Zeijen
  • Anvang: 20.00 uur

Anmelden kan veur maondag 19 meert bij Alie Homan:
hahoman @ hotmail.com/ 0592-542608 / 06-23304774

Der kunt 25 teams metdoen en vol = vol.

Streektaolstried Slien

  • Woensdag 29 meert
  • MFA De Brink in Slien
  • Anvang: 20.00 uur

Kiek ok op: streekeigensleen.nl

Streektaolstried Grol

  • vrijdag 31 meert
  • Het Markehuis in Grol
  • Anvang: 20.00 uur (inloop vanof 19.30 uur)

Woj metandoen? Meld je dan an bij: jghartlief @ ziggo.nl (06-46325905) of roelie @ pattyjoris.nl (06-14967724).

Streektaolstried Roon

  • Vrijdag 31 meert
  • Onder de Linden in Roon
  • Anvang: 20.00 uur

Woj metandoen? Mail dan naor sachakraan @ stwin.nl of kiek op www.welzijnnoordenveld.nl

Drentse Pubquiz in Hollaandscheveld

  • Vrijdag 14 april
  • Dorpscentrum ‘t Anker in Hollaandscheveld.
  • Anvang: 19.30 uur (inloop vanof 19.00 uur)
    Kosten: € 2,50 p.p.

Dizze quiz is een samenwarking tussen ‘t Anker en de streektaolvrijwilligers van het Huus van de Taol. Opgeven kan via ankeraanmeldingen@gmail.com .

Posted on

Drents ienakterfestival “Kört&Goed” op 1 april in Hoogeveen

Kaortverkoop finale in De Tamboer in Hoogeveen is begund
Streektaolorganisatie Huus van de Taol organiseert veur de veerde maol het Drentstaolige ienakterfestival Kört&Goed. Vief tenielgroepen streidt in theater De Tamboer in Hoogeveen um de hoogste eer. Wel wint het ienakterfestival in 2023? In 2019 was de veurige editie. Destieds wun tenielvereniging Crescendo oet Gieterveen.

Finale Hoogeveen op 1 april
Op zaoterdagaovend 1 april staot de vief ienakters in de Passagezaal van theater De Tamboer in Hoogeveen. Het publiek kreg tenielstukken te zien die tussen de 15 en 30 minuten lang bint.

Een deskundige jury zöt de tenielstukken veur het eerst en bepaolt an het ende van de aovend welke club de winnaor is van Kört&Goed 2023. In de pauzes zult de vrouwlu van zanggroep Dwarzz oet Emmen optreden.

Kaorten kost € 15,00 en kunt in de webshop van huusvandetaol.nl besteld worden en op de aovend zölf an de zaal kocht worden. Aanvang: 20.00 uur.

Foto: Anneke Bloema

Waorom?
Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert. Op het gebied van het toneel nemp het Drents een prominente plaots in. Veul verieniging in oeze provincie speult stukken in het Drents. Mensen als Herman van der Aa, Jan Veenstra, Ben ten Velde, Marga Kool, Erik Harteveld en Harm Dijkstra levert hieran een grote bijdrage. Het Huus van de Taol gef het speulen van Drentstalig teniel geern een extra drukkertie in de rug.

Posted on

Inschrieving Drèents Liedtiesfestival 2023 lös!

Het grootschaolige streektaol songfestival wordt veur de elfde maol organiseerd met as doel het schrieven, oetvoren en vastleggen van neie Drentstaolige kwaliteitsmeziek. De organisatie –Stichting REUR– rop mezikaanten, tekstschrievers en componisten van Drentstaolige meziek op om liedties in te sturen.

De inzunden liedties wordt deur een kemmissie bestaonde oet meziek- en tekstprofessionals beoordield. Oet de inzendingen wordt de tien beste liedjes keuzen veur de finale. Eende april 2023 wordt de finalisten bekend maakt via RTV Drenthe.

Finale

De finale van het Drèents Liedtiesfestival vindt plaots op dunderdag 18 mei 2023 in het ATLAS Theater in Emmen. Het Drèents Liedtiesfestival wordt LIVE oetzunden op RTV Drenthe en via het internet.

Het landelke pebliek stemt via sms op zien favoriete liedtien. Een inholdelke vakjury beoordielt de liedties toegeliekertied. Beide oetslagen bepaolt gezamenlk de oetèeindelke winnaar van het Drèents Liedtiesfestival.

DLF22-winnaar Rick Hilberts. foto: Bart de Nes

Stichting REUR en SUNS Europe festival

Stichting REUR vaardigt de winnaar van het Drèents Liedtiesfestival of as vertegenwoordiger van het Nedersaksisch hen het Europees Songfestival voor Minderheidstaolen op het SUNS Europe festival 2023. Sinds 2017 wuur het Nedersaksisch daor vertegenwoordigd deur Isa Zwart, Melissa Meewisse, Leon Moorman en Rick Hilberts.

Metdoen

Inzendings veur het Drèents Liedtiesfestival 2023 kunt tot en met 1 april 2023 ingestuurd worden hen Stichting REUR.

Dat kan via het online-anmeldformelier Rieglementen, anvullende infermatie en het leste neis bint te vinden op de webstee van Stichting REUR.