Tag: Huus van de Taol

Posted on

Symposium ‘Podium veur de Streektaol’

Op donderdag 2 oktober 2025 organiseren Stichting Nederlandse Dialecten en stichting het Huus van de Taol het jaarlijkse streektaalsymposium voor Nederland en Vlaanderen. En deze keer zetten we de streektaol écht op het podium!

Streektaal is meer dan alleen woorden. Het is cultuur, identiteit en verbinding. Tijdens het symposium ontdek je hoe streektaal tot leven komt in muziek, theater, boeken, technologie én in het voetbal. En hoe jij dat in je eigen werk of omgeving kunt toepassen.

Oetneudiging Streektaolsymposium Podium veur de Streektaol 2 oktober 2025 EmmenDownload

Aanmelden en meer informatie

Meer informatie, aanmeldmogelijkheid en het programma: klik hier.

Posted on

Boekprissentatie Anne Doornbos op Bunerveen … en een vermissing tiedens de jacht

In een gemoedelijke sfeer was op vrijdag 16 mei de boekprissentatie van Het offer an de paol, de neiste Drentstaolige thriller van schriever Anne Doornbos. De prissentatie weur holden in dörpshoes De Viersprong op Bunerveen. Het eerste exemplaar was veur Erwin Slomp van ‘t Hollandscheveld, teamchef basisteam Zuudwest Drenthe bij Politie Noord Nederland.

Het eerste exemplaar was veur Erwin Slomp van ‘t Hollandscheveld (links). Rechts: Anne Doornbos. Foto: Huus van de Taol

Familie, vrienden en collega-schrievers waren anwezig um te lustern naor de eerste fragmenten oet het spannende boek. Bert Hadders was der um toepasselijke liedties over moorden te zingen. Hadders is zes kilometer wiederop in Twaide Mond opgruid en har zo maor in de neiste thriller van Doornbos staon kunt. De schriever laot geregeld bekende Drenten een rol in zien boek speulen, vaok under een andere naam.

Het offer an de paol is het veerde verhaol van het Inspecteur Rossing-dossier. In 2018 verscheen de eerste Drentse thriller van Anne Doornbos bij Het Drentse Boek, De Paddenvanger. Daornao schreef e De man die Russisch preut en Grafgift. Doornbos nemp de lezer tiedens de zuuktocht van inspecteur Rossing met deur het Drentse landschap, dat altijd een prominente rol speult in zien verhaolen. In Het offer an de paol is dat niet aans:

Een dikke boer oet Bunerveen is vermist. Was e op jacht en is der wat gebeurd? Hef zien inzet veur windmeulens in De Monden hum opbreuken? Of hef zien verdwiening te maken met een aal wieder oplopende ruzie over lelieteelt? Zien gezin blef vertwiefeld achter.

boek signeren

In juni zal de schriever deur de provincie trekken um zien boek te signeren.

  • Zaterdag 7 juni: ’s mörgens bij de Readshop in Coevern, ’s middags bij boekhandel Vermeer in Emmen
  • Zaterdag 14 juni: ’s mörgens bij boekhandel Daan Nijman in Roon, ’s middags bij boekhandel Van der Velde in Assen

Het offer an de paol is veur € 19,95 te koop bij de betere boekhandel en via de webshop van het Huus van de Taol (huusvandetaol.nl/webshop)

Posted on

Ramon Kamps neie streektaolambassadeur Börger-Oring veur het Huus van de Taol 

Ramon Kamps oet Vaalt is de neie streektaolambasseur veur het Huus van de Taol in Börger-Oring. As streektaolambassadeur zal e der met een koppel vrijwilligers veur zörgen dat er streektaolactiviteiten in zien gemiente organiseerd wordt. 

Ramon Kamps (foto: Ramon Kamps )

Kamps woont met zien vrouw en drei kinder in Vaalt. In het dagelijks leven warkt e as coördinator bij een bouwbedrief. Daornaost zit e in de gemienteraod van Börger-Oring veur Leefbaar Börger-Oring. Volgens Kamps zörgt de Drentse taol veur een gevuul van verbundenheid: ‘Ik heb mij anmeld as streektaolambassadeur, umda’k het belangriek vin dat de Drentse taol beholden blef en deurgeven wordt an volgende generaties’. 

Renate Snoeijing, directeur van het Huus van de Taol: ‘Wij bint wies met Ramon as neie streektaolambassadeur. Hij brengt niet allent een groot hart veur de Drentse taol met, maor ok de energie en kiek op de zaak van een neie generatie. Dat is gold weerd veur de toekomst van het Drents.’ 

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die deur niet-gebroekers waardeerd wordt. 

Posted on

Managen op zien Drèents: dudelijker vergadern en beslissen in de streektaol

In managementoverleg vliegt de Engelse en abstracte jeukwoorden je vaak um de oren. Maor wat gebeurt er aj die vertaolt naor het Drèents? Dan blek dat veul begrippen iniene een stuk dudelijker wordt!

Daorum hef streektaolorganisatie het Huus van de Taol nou een handig overzicht samensteld met veulgebroekte management- en vergadertermen, vertaold naor het Drèents.

Met dizze liest wil het Huus van de Taol bedrieven, overheden en instellingen zien laoten dat helder communiceren niet ingewikkeld weden huuft. Waor ‘awareness creeëren’ misschien vaag klinkt, is ‘je zien laoten an de mèensen’ geliek dudelijk. En in plaots van ‘te weinig resources’ kuj ok gewoon zeggen daj der ‘gien tied of centen veur hebt’.

‘Wij markt dat veul mèensen in het Drèentse warkveld graag dudelijke taol hebt in plaots van wollige managementtermen’ aldus directeur Renate Snoeijing. ‘Deur termen in het Drèents te vertaolen, breng we ze terug naor de kern. Dat zörgt veur begriepelijke communicatie, soms met een knipoog.’

As veurbeeld nuumt Snoeijing nog dat het heur organisatie opvallen is dat in openbare vergaderingen van Drèentse overheidsinstellingen vaak moeilijke woorden gebroekt wordt, waordeur inwoners soms niet precies begriept wat er bepraot wordt. Het gebroek van dudelijke taol, zoas in dizze liest, kan bijdragen an betere communicatie en meer betrökkenheid van burgers.

De streektaolorganisatie neugt bedrieven, overheden en organisaties um de liest te gebroeken en bewuster um te gaon met taol in het wark.

De volledige liest is gratis te vinden op de website van het Huus van de Taol: huusvandetaol.nl/managen

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers waardeert.

Posted on

Metzingen in groot Drentstaolig Vrijheidskoor kan op 5 april in Coevern

Op 5 april is in Coevern de officiële oftrap van het project ‘80 jaor vrijheid’. En op die dag kunt liefhebbers metandoen in een groot Drentstaolig Vrijheidskoor. Dit bezundere koor zingt under leiding van The Serenade Sisters een nei lied: Vrijheid is nooit of . Dit lied is speciaal arrangeerd veur koren in een veerstemmig arrangement.

’s Mörgens wordt het Drentstaolige vrijheidslied tiedens een workshop under leiding van de zangeressen Josien van Beek en Martijje instudeerd. Het doel is um een mega-koor bij mekaar te verzameln um ’s middags de vrijheid te bezingen tiedens het officiële programma van de previncie Drenthe.

Mèensen die metandoen wilt kunt zuch anmelden op huusvandetaol.nl/vrijheid-veuroet. Hier is het lied, het arrangement en ok een driestemmig arrangement veur koren gratis te downloaden.

Dit project is een samenwarking van The Serenade Sisters met het Huus van de Taol en is met meugelijk maakt deur de previncie Drenthe.

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers waardeert.

The Serenade Sisters bint veer zangeressen die mekaar vunden hebt in heur onbetwiste liefde veur close harmony.

Posted on

Streektaolorganisaties biedt met mekaar podium an het Veenkoloniaols

Huus van de Taol en CGTC organiseert een aovend ‘Veenkoloniao/oals!’ in Valthermond.

Tiedens de Meertmaond Streektaolmaond zuukt het Huus van de Taol en het Centrum Groninger Taal en Cultuur de samenwarking veur een aovend die podium gef an een keur van artiesten en schrievers die de taol van de Veenkoloniën in heur wark gebroekt.

Het gebied stiet bekend as roeg en rauw. En dat gegeven is een goeie inspiratiebron, getuge de hoeveulheid schrievers en muzikanten die dit gebied voortbrengt. Dit anbod an artiesten en dat was oes as Drenthe en Grunningen bindt – de taol – vörmt de basis veur de speciale aovend met de naam ‘Veenkoloniao/oals!’ op 22 meert in d’Rentmeester in Valthermond.

Programma

Dizze aovend vol praoterij, schrieverij en meziek trapt of met Silvia Fledderus oet Valthermond. Aagje Blink, Harma de Roo, Annie Martens en Jan Harbers vertelt oet eigen wark. En tiedens de twei praottaofels gaot de artiesten in gesprek met Fieke Gosselaar (streektaolconsulent CGTC), Arja Olthof (streektaolfunctionaris Huus van de Taol) en Maarten Zwiers (onderzuker streekcultuur van de Rijksuniversiteit Groningen). De aovend wordt in stijl ofsleuten deur Erwin de Vries.

De deuren van d’Rentmeester bint lös vanof 19.30 uur, um 20.00 uur begunt het programma. Veur een tientie kuj derbij wezen, de entreepries in inclusief een kop koffie of thee.

Praktische informatie

Daotum: 22 meert 2025, 19.30 uur (deur lös), 20.00 uur (start programma)

Locatie: d’ Rentmeester, Zuiderdiep 279, Valthermond

Meer informatie en kaorten: huusvandetaol.nl/veenkoloniaols

Posted on

Zesde seizoen Drentstaolige podcastserie ‘Praot Drents Met Mij’ begund!

Vandaag verschient de eerste oflevering van het zesde seizoen van de populaire Drentstaolige podcastserie Praot Drents Met Mij. In dizze podcastserie, een samenwarking tussen het Huus van de Taol en regionale omroep RTV Drenthe, giet directeur Renate Snoeijing in gesprek met bekende en minder bekende Drenten over de rol die het Drents in heur leven speult.

Elke oflevering böd een boeiend en persoonlijk gesprek waorin het leven van de gast centraal stiet. Van muzikaant tot schriever en van augurkenteler tot haorwarkspecialist: allemaol dielt ze heur verhaolen en praot ze over wat de Drentse taol veur heur betiekent.

Met de podcast Praot Drents Met Mij wil het Huus van de Taol heuren laoten hoe limtig en divers de Drentse taol is. ‘Het Drents is een taol met een rieke geschiedenis, maor ok veural een taol van nou,’ zeg Renate Snoeijing. ‘In dizze podcast heur je hoe mèensen van verschillende achtergronden en leeftieden het Drents beleeft en gebroekt’.

Het neie seizoen van Praot Drents Met Mij is vanof vandaag te belustern via alle bekende podcastplatforms en de website van RTV Drenthe. De eerste gast is augurkenteler Marcel Pijl oet Hieken. Aandere gasten in dit neie seizoen bint undermeer journalist Annemiek Meijer, TikTokker Marco Holties en wetholder Rieja Raven. Elke dinsdag komp der een neie oflevering online.

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers waardeert.

Posted on

Meertmaond Streektaolmaond feestelijk lösdaon in Aa en Hunze

De Meertmaond Streektaolmaond is dit jaor officieel lösdaon tiedens een bezundere lunchbijienkomst veur de metwarkers van de gemiente Aa en Hunze. Op maondag 3 meert hebt burgemister Anno Wietze Hiemstra en Renate Snoeijing, directeur van het Huus van de Taol, in de maande het officiële startsein geven in de kantine van het gemientehoes. Hiermet understreept de gemiente het belang van de Drentse taol en cultuur.

Nao het officiële lösdoen bint de ambtenaren underdompeld in het Drents met een heuse Drentse kwis – een interactieve en luchtige menier um meer te leren over de Drentse taol en cultuur. De kwis weur verzörgd deur de streektaolvrijwilliger Jan Hartlief. En het gung der fanatiek an toe tiedens de kwis. Lang leek metwarker Kitty der met de winst vandeur te gaon, maor op het lèeste moment bleek wetholder Ivo Berghuis toch net ien punt lozer te weden.

Burgemister Hiemstra nao ofloop van de bijienkomst: ‘De streektaol is een belangriek underdiel van oeze cultuur. Met dizze feestelijke start van de Meertmaond Streektaolmaond laow zien daw de Drentse taal niet allent wardeert, maor ok actief gebroeken en deurgeven wilt.’

Renate Snoeijing vult an: ‘Het Huus van de Taol zet zuch in veur het behold en de promotie van de Drentse taol. Wij bint dan ok bliede dat de gemiente Aa en Hunze de oftrap van dizze maond vieren wil met een actieve bijdrage an het gebroek van het Drents in het dagelijks wark.’

De Meertmaond Streektaolmaond is een jaorlijkse viering van de streektaol, met activiteiten en evenementen in hiel Drenthe.

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers waardeert.

De gemiente Aa en Hunze is ien van de grootste plattelandsgemienten in Nederlaand met zu’n 25.000 inwoners, 35 dörpen en kernen en een oppervlakte van roem 270 km2.

Posted on

Ans Klok kreg erespeld van Huus van de Taol

In Grand Café De Brink in Dwingel hef directeur Renate Snoeijing oet naam van bestuur en metwarkers de erespeld van het Huus van de Taol bij Ans Klok opspeld. Dit gebeurde an ’t ende van Taal an Taofel, de gezellige mörgen met gedichten, proza en meziek. Ans Klok kreg het eretieken veur al heur verdiensten veur de Drentse streektaol.

Ans Klok is sinds 2008 Streektaolambassadeur (vrogger wur dit Taolschulte nuumt) en leidt al jaoren de vrijwilligers van het Huus van de Taol in de gemiente Westerveld bij undermeer het veurleesproject op de schoelen in de meertmaond-streektaolmaond. Sinds 2011 is ze de metorganisator van Taal an Taofel in Dwingel. Ok regelt ze elk jaor tiedens Nacht van de Nacht in oktober een wandeling langs het bos bij Lhee met underweg andacht veur de Drentse schrieverij. En dan is ze ok nog krapan 25 jaor Drentstaolig trouwambtenaar. Een vrouw met een tomeloze inzet, humor en veural liefde veur de Drentse taol en cultuur verdient de erespeld van het Huus van de Taol, zeg Renate Snoeijing.

Ans Klok kreg erespeld van Huus van de Taol. Foto: Huus van de Taol

Op dizze zundag 9 febrewaori gung um tien veur twei de deur van de achterzaol van De Brink lös en daor kwam de directeur van het Huus van de Taol binnen, saomen met de kinder van Ans Klok en Jan Germs, Hermien Haar, Anne Doornbos en Hans Jalvingh, allemaol draogers van de erespeld. Ans Klok wus van niks vanzölf, maor toen ze heur kinder zag har ze wel wat deur. Nao de oetreiking van de erespeld was het tied veur een borrel veur elkenien en een proost op Ans Klok

Posted on

Neie dichtbundel van Suze Sanders: Draogers van twiefellocht

In het Huus van de Taol in Beilen was vrijdag 31 jannewaori de boekprissentatie van de neiste bundel van Suze Sanders. In Draogers van twiefellocht kuj 36 gedichten vinden, verdield in vief blokken. Van Boetenspel en Waorheid en gezichtsbedrog tot gedichten over Noorwegen en Nei-Zeelaand.

Vrijdag gung het eerste exemplaor van Draogers van twiefellocht naor literatuurhistoricus Henk Nijkeuter. Hij har lovende woorden veur Suze Sanders. De prissentatie weur nog feestelijker deur optredens van het trio Heeren Oud-Zuid oet Assen. Zij hadden teksten van eerdere gedichten van Sanders op meziek zet.

V.l.n.r.: Henk Nijkeuter en Suze Sanders. Foto: Huus van de Taol.

Draogers van twiefellocht is een prachtige dichtbundel en is te koop veur € 13,50 bij de boekhandel en bij het Huus van de Taol in Beilen.