Tag: RTV Drenthe

Posted on

Zesde seizoen Drentstaolige podcastserie ‘Praot Drents Met Mij’ begund!

Vandaag verschient de eerste oflevering van het zesde seizoen van de populaire Drentstaolige podcastserie Praot Drents Met Mij. In dizze podcastserie, een samenwarking tussen het Huus van de Taol en regionale omroep RTV Drenthe, giet directeur Renate Snoeijing in gesprek met bekende en minder bekende Drenten over de rol die het Drents in heur leven speult.

Elke oflevering böd een boeiend en persoonlijk gesprek waorin het leven van de gast centraal stiet. Van muzikaant tot schriever en van augurkenteler tot haorwarkspecialist: allemaol dielt ze heur verhaolen en praot ze over wat de Drentse taol veur heur betiekent.

Met de podcast Praot Drents Met Mij wil het Huus van de Taol heuren laoten hoe limtig en divers de Drentse taol is. ‘Het Drents is een taol met een rieke geschiedenis, maor ok veural een taol van nou,’ zeg Renate Snoeijing. ‘In dizze podcast heur je hoe mèensen van verschillende achtergronden en leeftieden het Drents beleeft en gebroekt’.

Het neie seizoen van Praot Drents Met Mij is vanof vandaag te belustern via alle bekende podcastplatforms en de website van RTV Drenthe. De eerste gast is augurkenteler Marcel Pijl oet Hieken. Aandere gasten in dit neie seizoen bint undermeer journalist Annemiek Meijer, TikTokker Marco Holties en wetholder Rieja Raven. Elke dinsdag komp der een neie oflevering online.

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers waardeert.

Posted on

Sukelao(gie) is Lekkerste Drentse Woord

Streektaolorganisatie het Huus van de Taol hef in samenwarking met RTV Drenthe dit jaor naor het lekkerste Drentse woord in oeze streektaol zöcht. Nao een inzendronde en een stemronde is nou de winnaar bekend. Nao een spannende verkiezingsweek bleek sukelao(gie) net vier stemmen meer as gloepends te hebben.

Een greep oet alle inzendingen van dit jaor:  dreuge worst, siepelsoep, smokkie, knieperties, kloetenborrel, slik, kruusdoorns, proemenkreuze, hassebassie, sneiballegie, kleistern en snuupie.

Zowat 800 stemmen kwamen der binnen op de top 5 van het lekkerste Drentse woord, waorbij bleek dat stemmers niet allent in Drenthe woont. Der kwamen ok veul stemmen oet aandere Nederlaandse previncies en zölfs oet Duutslaand, Zwitserlaand en Australië.

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers waardeert

Posted on

Bin ie de mieste loze Drent ? Geef je dan nou op veur kennisquiz LOOS en win de 11e editie!

Wel wordt de miest loze Drent van 2025? Dat wordt dit jaor weer dudelijk in LOOS, dé kennisquiz over Drenthe waorin underwarpen as de Drentse streektaol, topografie, geschiedenis en actualiteit an bod komt. Hol ie van puzzels en spellegies? Meld je dan nou an en wel wet bi’j een jaor lang de miest loze Drent.

LOOS bestiet oet meerdere rondes. In elke oflevering gaot drei dielnimmers de stried an. Vanoet de veurrondes gaot er oeteindelijk drei kandidaten naor de finale. De winnaar kreg niet allén de titel ‘Looste Drent’, maor wint ok een schiere pries.

De opnames bint op dinsdag 4, woensdag 5 en dunderdag 6 febrewaori 2025. Je huuft niet op alle aovends anwezig te weden. Doej ok met? Geef je dan veur 19 jannewaori op via het anmeldingsformulier op https://www.rtvdrenthe.nl/kijk/loos.

LOOS is een samenwarking tussen RTV Drenthe en het Huus van de Taol. Vanof 27 febrewaori wordt de kennisquiz aal warkdaogen oetzunden op TV Drenthe. De prissentatie is in haanden van Aaldert Oosterhuis.

Foto: RTV Drenthe

Het Huus van de Taol is de streektaolorganisatie die het Drents anfietert met as doel um het een taol te laoten wezen waor de gebroekers wies met bint en die de niet-gebroekers wardeert.

RTV Drenthe is, as betrouwbare en onafhankelijke informatiebron, de spil in de Drentse samenleving.

Posted on

Marianne Veenstra wint Drèents Liedtiesfestival 2024!

Op dunderdag 9 mei 2024 vun de twaalfde editie plaots van het Drèents Liedtiesfestival. In de finale in het ATLAS Theater in Emmen kreeg Marianne Veenstra met het liedtien “t Is zo wisse (as een klontie zuut is)” de mieste stemmen bij de verscheiden vakjury’s. Het Drèents Liedtiesfestival wordt organiseerd deur Stichting REUR. Dit jaor bestun de tv-vakjury oet Eric Bats, Julia Hulshof en Jord Brinkhuis.

Marianne Veenstra. foto: Abbot Studio / Bart de Nes

Zoas ieder jaor wuurden de punten verdield deur een vakjury -underverdield in drie groepen-, boetendes kun ‘t pebliek gedurende de rechtstreekse oetzending van RTV Drenthe via sms een stem oetbrengen.

De aandere negen dielnimmers an het DLF24 waren waren Skuur, Martin Hietkamp, Sister Sister, Ellen Dost, Drèents Grøs, Chantal Hulshof, Werilt, Richard Nijstad en Laura Dik. Vleden jaor wun Lisa Harms het Drèents Liedtiesfestival met “Tot de zun uutgiet”.

winst

Met dizze winst krig Marianne € 2000,- um heur winnende liedtien op een professioniele wieze op te nimmen en oet te brengen en zal ze later dit jaor dielnimmen an het Europees Songfestival veur Minderheidstaolen op het Suns Europe festival in Udine, waor ze het Nedersaksisch vertegenwoordigen zal.

Ook Marianne zal Drenthe vertegenwoordigen op het Regio Songfestival. De dartien regionale, peblieke umroepen organiseert samen een Regio Songfestival. De allereerste editie wuur lesten jaor op 4 november in Utrecht holden. Dit jaor vindt het festival plaots op 9 november in Theater aan het Vrijthof in Maastricht.

Posted on

Finalisten Drèents Liedtiesfestival 2024 bekend!

Veur de twaalde maol organiseert Stichting REUR het Drèents Liedtiesfestival. Dit songfestival zörgt derveur dat der een brieder anbod komp van neie Drèentstaolige kwaliteitsmeziek.

Stichting REUR vruug alle mezikaanten en tekstschrievers weer um heur beste en liedties in te sturen. Nao het sluten van de inzendtermien hef een beoordielingskemmissie de 22 inzendings beoordield en de oeteindelke finalisten oetkeuzen.

finalisten DLF24

De finalisten van het DLF24 bint:

Titel:Artiest:Tekst:Meziek:
GisterSkuurSkuurSkuur
Törf, jenever en spietMartin HietkampM. HietkampM. Hietkamp
Schoonebeeker EulieDréents GrøsB. HilbertsB. Hilberts |H. Luurtsema
Hey SuzieSister SisterR. Keuter | J. Staal |D. HendriksJ. Staal, F. Vollink |R. Prins
BewondernChantal HulshofI. SmidE. Funke
t PadtieEllen DostE. DostM. Buiter
SomsWeriltGijs-Peter KuijpersGijs-Peter Kuijpers| R. Hermans
t Is zo wisse (as een klontie zuut is)Marianne VeenstraM.A. VeenstraM.A. Veenstra
Altied nog wat kindLaura DikR. Keuter | J. Staal | D. HendriksR. Keuter | R. Prins
Umdat ‘t zo niet langer kanRichard NijstadR. NijstadJ. Zwart

stichting REUR

Stichting REUR mak zuch stark veur de Drèentstaolige meziekcultuur in de bredte en brengt daormet de ansluting tot staand van het Nedersaksisch en Drèents bij aandere (inter-)nationale minderheidstaolen.

ATLAS Theater en RTV Drenthe

De finale van het Drèents Liedtiesfestival is op 09 mei 2024 in het ATLAS Theater in Emmen en wordt LIVE oetzunden op RTV Drenthe.
Lisa Harms -winnaar van DLF23- komp zien winnende liedtien ‘Tot de zun uut giet’ nog een maol zingen en zal de pries deurgeven an de winnaar van DLF24.

Lisa Harms -winnaar van DLF23. Foto: Stichting REUR

winnaar

De winnaar van de finale wint een geldbedrag van € 2000,- um te besteden an het opnimmen en oetbrengen van zien of heur winnende liedtien en zal het Nedersaksisch vertegenwoordigen op het Europees Songfestival veur Minderheidstaol tiedens het Suns Europe festival in Udine en de previncie Drenthe vertegenwoordigen op het Regio Songfestival later dit jaor.


Posted on

Kaortverkoop Drèents Liedtiesfestival begund

Op 9 mei 2024 vindt de twaalfde editie van het Drèents Liedtiesfestival plaots. De kaortverkoop is begund via de webstee van het ATLAS Theater. Tien finalisten prissenteert in de finale een nei iegen liedtien. Een inholdelke vakjury, mar ok het landelke pebliek speult een belangrieke rol in het kiezen van de winnaar. Via SMS kan het pebliek op een favoriet liedtien stemmen. Dizze oetslag, in combinatie met de oetslag van de verscheiden vakjury’s, bepaolt de oetèendelke winnaar van het Drèents Liedtiesfestival.

De winnaar krig een geldpries van € 2000,- um te besteden an een professioniele opname van het winnende liedtien en zal het Nedersaksisch vertegenwoordigen op het prestigieuze SUNS Europe Festival 2024 in Friulië.

Anmelden tot 9 meert
De organisatie -Stichting REUR- rop mezikaanten, tekstschrievers en componisten van Drèentstaolige meziek op om liedties in te sturen veur 9 meert 2024. Een kundige kemmissie van meziek- en tekstprofessionals zal elk inzunden liedtien beoordielen en de -maximaal- tien besten oetverkiezen veur de finale op dunderdag 9 mei 2024 in het ATLAS Theater.

De finale wordt RECHTSTREEKS oetzunden op RTV Drenthe en via het internet. Op 6 april 2024 um 16.00 uur wordt de finalisten bekendmaakt via RTV Drenthe.  

Metdoen
Inzendings veur het Drèents Liedtiesfestival 2024 kunt tot en met 9 meert 2024 instuurd worden naor Stichting REUR. Dat kan via het online-anmeldformelier op de webstee van Stichting REUR. Rieglementen, anvullende infermatie en ‘t leste neis bint te vinden op www.drentsdlf.nl en www.stichtingreur.nl

Posted on

Het Liefste Drentse Woord is bekend

Streektaolorganisatie het Huus van de Taol hef samen met RTV Drenthe dit jaor naor het liefste Drentse woord oet oeze streektaol zöcht um zo het jaor op een positieve manier of te sluten. Nao een inzendronde en een stemronde is nou het liefste woord bekend.

Van alle inzendingen weurden vief woorden het vaakst instuurd:

  • Smokkie
  • Poppie
  • Prugeltie
  • Tutebekkie
  • wichie/maagie/maegie

Een greep oet alle inzendingen van dit jaor: gloepertie, loekertie, doeken, zwalvie, meizuvertie, buigie, ankroeperiesweer, kleine knoesies, laompie, longern, sukerklontie, naober, maotie en moezeverzoepertie.

Liefste Drentse Woord

Nao een spannende verkiezingsweek bleek wichie/maagie/maegie de mieste stemmen te hebben. Het woord kwam het vaakst binnen, vaak in combinatie met lief of nuver. Maor het woord veur ‘meisje’ is niet deur hiel de provincie geliek. In het zuudwesten van Drenthe wordt zegt ze maagie, met een klankverandering naor maegie in het westen. Daormet lat dit lieve woord ok nog ies de variatie binnen de taol zien, variatie in klaank én in woordenschat.

Veul inzenders van het woord wichie/maagie/maegie woont  opmarkelijk genog niet in Drenthe zölf. Veul Drenten boeten Drenthe gebroekt dizze liefkozing nog altied of herinnert zuch dit woord van olders of grootolders. Ok niet-Drenten met een Drentse partner stuurden het in.

Huus van de Taol
Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert.

Posted on

Anmelding Drèents Liedtiesfestival 2024 lös!

Veur de twaalfde keer op riege komp het grootschaolige streektaal-songfestival der weer an, met as doel het schrieven, oetvooren en vastleggen van neie Drèentstaolige kwaliteitsmeziek. De organisatie –Stichting REUR- röp mezikaanten, tekstschrievers en componisten van Drèentstaolige meziek op um liedties in te sturen. Een kundige kemmissie van meziek- en tekstprofessionals zal elk inzunden liedtien beoordielen en de tien besten sillecteren veur de finale op dunderdag 9 mei 2024 in het ATLAS Theater. De finale wordt LIVE oetzunden op RTV Drenthe en via het internet.


Niet allén een inholdelke vakjury, mar ok het landelke pebliek speult een belangrieke rol in het kiezen van de winnaar. Via SMS kan het pebliek op een favoriet liedtien stemmen. Dizze oetslag, in combinatie met de oetslag van de vakjury, bepaolt de oetèendelke winnaar van het Drèents Liedtiesfestival. De winnaar untvangt een geldpries van €2000,- om te besteden an een professioniele opname van het winnende liedtien.

Op 6 april 2024 wordt de sillectie van de finalisten bekend maakt via RTV Drenthe.

Stichting REUR en SUNS Europe festival.

Behalve de al nuumde geldpries vertegenwoordigt de winnaar van het Drèents Liedtiesfestival het Nedersaksisch op het prestigieuze SUNS Europe Festival 2024 in Friulië – Italië. Een unieke kaans um Drèentse meziek over de grèenzen te brengen. Sinds 2017 wuur het Nedersaksisch daor vertegenwoordigd deur Isa Zwart, Melissa Meewisse, Leon Moorman, Rick Hilberts en Lisa Harms.

Metdoen

Inzendings veur het Drèents Liedtiesfestival 2024 kunt tot en met 9 meert 2024 ingestuurd worden hen Stichting REUR. Dat kan via het online-anmeldformelier op de webstee van Stichting REUR. Rieglementen, naodere infermatie en het leste neis kuj
vinden op www.drentsdlf.nl en www.stichtingreur.nl.

Posted on

Finalisten Drèents Liedtiesfestival 2023 bekend!

Veur de elfde maol organiseert Stichting REUR het Drèents Liedtiesfestival. Dit songfestival zörgt der veur dat der een brieder anbod komp van neie Drèentstaolige kwaliteitsmeziek.

Stichting REUR mak zuch stark veur de Drèentstaolige meziekcultuur in de bredte en brengt daormet de ansluting tot staand van het Nedersaksisch en Drèents bij aandere (inter-)nationale minderheidstaolen.

finalisten

Stichting REUR vruug alle mezikaanten en tekstschrievers weer um heur beste mezikale bien veur te zetten en liedties in te sturen. Nao het sluten van de inzendtermien hef een beoordielingskemmissie 20 inzendings beoordield en de oeteindelke finalisten oetkeuzen. De finalisten van het DLF23 bint:

Titel:Artiest:Tekst:Meziek:
Argens underwegEmileEmile BoerEmile Boer
PlaggehutNoordwaartsJohnny van WijkBand Noordwaarts
SelahBertine SnippeBertine SnippeGerwin Jutstra
(De ballade van) Teunis WietDréents GrøsBert HilbertsBert Hilberts
Als de wolv’n kommenWerilt  (Gijs-Peter Kuijpers)Gijs-Peter KuijpersGijs-Peter Kuijpers & Ruud Hermans
Tot de zun uut gietLisa HarmsR. Keuter, D. Hendriks, R. PrinsR. Keuter, D. Hendriks, R. Prins
Geef het even wat tiedMarianne VeenstraMarianne VeenstraMarianne Veenstra / Niels Lingbeek
Kom dans met mijMadelon HeijnenE. Heijnen, M. HeijnenMickey Bakker
Zo’n kerel as hijSister SisterR. Keuter, D. Hendriks, E. FunkeR. Keuter, D. Hendriks, E. Funke
Loeiende sirenesMarjolein SchepersGeert Leurink & Harro WimmenhGeert Leurink & Harro Wimmenhove

finale

De finale van het Drèents Liedtiesfestival is op 18 mei 2023 in het ATLAS Theater in Emmen en wordt LIVE oetzunden op RTV Drenthe. Rick Hilberts -winnaar van DLF22- komp zien winnende liedtien ‘Vallende sterren’ nog een maol zingen en zal de pries deurgeven an de winnaar van de 2023-editie.

De winnaar van de finale wint een geldbedrag van € 2000,- um te besteden an het opnimmen en oetbrengen van zien of heur winnende liedtien en zal het Nedersaksisch vertegenwoordigen op het Euoprees Songfestival veur Minderheidstaol tiedens het Suns Europe festival in Udine later dit jaor.

Posted on

Finalisten Drèents Liedtiesfestival 2022 bekend!


Veur de tiende maol organiseert Stichting REUR het Drèents Liedtiesfestival. Dit songfestival zörgt der veur dat der een brieder anbod komp van neie Drèentstaolige kwaliteitsmeziek. Stichting REUR mak zuch stark veur de Drèentstaolige meziekcultuur in de bredte en wil ansluting kriegen van het Nedersaksisch en Drèents bij aandere (inter-)nationale minderheidstaolen. Stichting REUR ruup dit jaor ruup alle mezikaanten en tekstschrievers weer op um heur beste mezikale bien veur te zetten en liedties in te sturen.

Nao het sluten van de inzendtermien hef een beoordielingskemmissie 20 inzendings beoordield en de oeteindelke finalisten oetkeuzen. De finalisten van het DLF22 bint:

titelartiesttekstmeziek
Vallende sterrenRick HilbertsRick HilbertsRick Hilberts
Op papier is hij gelokkigMaurice MulderijMaurice MulderijMaurice Mulderij
Hef nog een glasJaap LamfersHarro Wimmenhove, Geert LeurinkHarro Wimmenhove, Geert Leurink
Feesten in VegasGersEmile Boer & Gerwin JutstraEmile Boer & Gerwin Jutstra
IenvoldEmile Boer Emile Boer Emile Boer
Gien chemieHarold Habing (+ bandHarold HabingHarold Habing
Geef mie de maoneBeau VeldkampRobin Muilwijk/Rosalie MeijerJohan Boekema/Robin Muilwijk
Dan hej’ t hek van de damMarianne VeenstraM. Veenstra / N. LingbeekM. Veenstra / N. Lingbeek
Ik bin het zatBrúúnsmaTheo BruinsmaTheo Bruinsma
Goed misGercoh. & de Schavuit’nAnne Exterkate & Gerco KleinAnne Exterkate & Gerco Klein


De finale van het Drèents Liedtiesfestival is op 2 juli 2022 in het ATLAS Theater in Emmen en wordt LIVE oetzunden op RTV Drenthe. Jolien -winnaar van DLF21- komp zien winnende liedtien ‘Vuul’ nog een maol zingen en zal de pries deurgeven an de winnaar van de 2022-editie. De winnaar van de finale wint een geldbedrag van € 2000,- um te besteden an het opnimmen en oetbrengen van zien of heur winnende liedtien.