Kinder valt in de priezen met kleurplaat en puzzels oet streektaoltiedschrift
In de Meertmaond Streektaolmaond was traditiegetrouw weer het veurleesproject van streektaolorganisatie Huus van de Taol. Kinder waor an veurlezen is kregen as andenken het tiedschrift Wiesneus. Ze kunden zuch in dit Drentse doeboek, met het thema Op Aoventuur vernuvern met Drentse verhaolen, gedichten, puzzels en een kleurplaat. Oet de inzendings hef de jury vief winnaars keuzen.
De woordzuker har as oetkomst de zin Aoventuur begunt mit een verhaal. Met dizze oplössing wun Abel oet Raol een mooie pries. En de diagrampuzzel leverde het woord tweilocht op, Drents veur ‘schemering’. Dat wus Selinde oet Slien ok. Ok zij kreg een beloning veur heur puzzelwark.
De kleurplaot, tiekend deur illustrator Natascha Stenvert, kwam schier inkleurd weerum naor Beilen. Thomas van de Smilde, Pepijn oet Börk en Djoëlle oet Hollandscheveld kregen daorveur een pries.
De vrijwilligers oet de eigen gemiente van de prieswinnaars bint op pad gaon um de priezen oet te langen. Veur wel de Wiesneus nog digitaal bekieken wil, of der met gangs wil op schoel kan hum vinden op huusvandetaol.nl/wiesneus. Ok kuj daor de liedties belustern en stiet er een lesbrief met creatieve meugelkheden veur in de les.
Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers wardeert.