De Nedersaksische en Nederduutse streektaelen hebben slim verlet van impulsen. Projekten op internet, schoelen en meer moe’n et Sallaans, Veluws, Aachterhoeks, Stellingwarfs, Twents, Drents, Grunnings en liekegoed et Nederduuts in Duutslaand ni’j leven inblaozen bi’j de jongere en kommende generaosies.
De eerste konfereensie over et Nedersaksisch / Nederduuts in et Europees Parlement wil mithelpen om idenen van de grond te kriegen om et Nedersaksisch en Nederduuts weer starker te maeken. De konfereensie is op 28 september in Brussel, mit veul dielnemers uut Nederlaand, Duutslaand en veerder.
De konfereensie die now op staepel staot is een initiatief van Annie Schreijer-Pierik (Europarlementslid CDA uut Twente), heur Duutse kollega Jens Gieseke (CDU) en et Europees Buro veur Kleine Taelen (EBLT) uut Liwwadden.
“Mit et prachtige Nedersaksisch kun miljoenen mensen tot aachter in Duutslaand en Zuud-Denemarken mekeer verstaon. Dit gaot over greenzen henne, et past bi’j oonze kultuur”, zegt Annie Schreijer-Pierik. “Mar de jonge generaosies heuren et Nedersaksisch minder en verleren et zodoende. Et moet krek aandersomme!”
Onno Falkena (EBLT): “As Fries bin ik wel es ofgeunstig op dat enorme taelgebied van et Nedersaksisch. De tael is bi’j uutstek een Europees fenomeen. Et EBLT liekt et daoromme prachtig dat et Nedersaksisch volop klinken zal in Brussel. De tael verdient et.”
Sprekers bi’j de konfereensie bin o.e. experts minderhiedstaelen van de Europese Kemmissie, van de Raod van Europa, dr. Reinhard Goltz van de Bundsraat för Nedderdűűtsch, Jan Kruimink (projektleider Drents op schoelen), dippeteerde Eric Lievers (Overiessel), ds. Anne van der Meiden (vertaeler van de Biebel in et Twents) en et Duutse parlementslid Gitta Conneman. Veur de Streektaelorgenisaosies Nedersaksisch Taelgebied (SONT) sprekt veurzitter Hans Gerritsen, veur EBKT en SONT de Stellingwarver taelkundige Henk Bloemhoff.
Et pergramme:
Welkom
15.00 Annie Schreijer-Pierik (NL) MEP
15.00 Onno Falkena (NL) Expert minderhiedstaelen
15.05 Jens Gieseke (DE) MEP
Wat is Nedersaksisch?
15.10 Henk Bloemhoff (NL) Bestuurslid EBLT; SONT; taelkundige
15.20 Reinhard Goltz (DE) Direkteur INS en vz. Bundsraat för Nedderdüütsch
Hoe vieter ie Nedersaksisch an?
15.30 Gitta Conneman (DE) Lid Duutse Bondsdag (CDU)
15.40 Eric Lievers (NL) Lid van et perveensiebestuur Overiessel
15.45 Hans Gerritsen (NL) Veurzitter Streektaelorgenisaosies Nedersaksisch Taelgebied (SONT)
Beste praktiekveurbeelden:
15.50 Anne van der Meiden (NL) Doomnie; vertaeler van de Biebel in et Twents
16.00 Jan Kruimink (NL) Projektleider Drents en Duuts op schoelen
16.10 Cornelia Nath (DE) Direkteur van et Plattdütskbüro van de Ostfriesischen Landschaft
16.20 Jochem de Groot (NL) Manager EU-zaeken binnen Microsoft Translate Benelux
16.30 Sterre Leufkens (NL) Taelonderzuker van de Universiteit van Utrecht
Nedersaksisch in de media:
16.40 Martin ter Denge (NL) Artiest en Facebook-schriever in et Nedersaksisch
16.50 Hedwig Ahrens (DE) Journalist NDR-Radio
Wat kan Europa doen?
17.00 Sixto Molina (ES) Heufd van et siktariaot van de Europese Raod
17.10 Szabolcs Horvath (HU) Lid van et kammenet van EU-kommesaoris Navracsics (Kultuur)
Konklusie:
17.20 Annie Schreijer-Pierik, Jens Gieseke
17.30 Koncert van et Nedersaksisch Vocaal Ensemble
De meerste toespraoken zullen in et Nedersaksisch wezen. D’r zal in et Nederlaans, Duuts en Engels vertaeld wodden.
Bezukers kun heur tot 15 september opgeven via annie.schreijer-pierik@ep.europa.eu