We the North? Meertaoligheid heurt bij het DNA van Fryslân, Grunning en Drenthe!

we the northOpen brief van het Europeesk Buro foar Lytse Talen/Europees Buro voor Kleine Talen an ‘We the North’, de previncies Fryslân, Grunning en Drenthe en de gemientes Leeuwarden, Grunning, Assen en Emmen.

Al een beste zet warkt de previncies Fryslân, Grunning en Drenthe meer met mekaor saomen as het giet um cultuur. De previncies wilt mekaor bij neie initiatieven helpen en boetendes de landsregering zien laoten dat ok boeten de Randstad – in de plattelandsgebieden – overal cultuur te vinden is, die de muite weerd is, en dat previncies en culturele organisaotsies in het noorden recht hebt op een redelijk diel van de Rieksgelden veur cultuur. Wij hebt ja Tryater, het NNO, Jeugdtheatergezelschappen, museums die dertoe doet en aal maor meer en mooiere festivals. Körtum: het is hier al lang gien Pauperparadies meer.

De previncies hebt vandaog-de-dag een mandielig pottie veur verneiende culturele initiatieven. De hogere bijdraoge van het Riek waor wij met dit gemienschappelijke initiatief op hoopt, holdt tot nou an toe niet over. Het EBLT snapt de bedoelingen en de idealen achter dit initiatief en stiet ok vierkant achter het streven naor een eerlijke verdieling van de Rieksgelden veur cultuur. Een riek cultureel leven met een grote verscheidenheid wil wij ok geern verstarken.

Maor, wij mist ok wat aw kiekt naor de prissentaotsie van ‘We the North’. In de prissentaotsie, de plannen en zölfs in de beschrieving van de noordelijke cultuur mis wij tot nou an toe het Fries en het Nedersaksisch – Grunnings, Drèents en Stellingwarfs – as belangrieke cultuurdraogers waor volop in zungen, schreven en tenielspeuld wordt. En het is nou krek die vanzölfsprekende meertaoligheid, waor wij het Bildts ok toe rekend, die in oeze ogen de kern van het DNA van Fryslân, Grunning en Drenthe is. Een Lân fan Taal holdt ja niet op bij de gemientegrèenzen van de Culturele Hoofdstad van 2018. En ok niet bij de Rieksgrèens; juust op het gebied van
meertaoligheid bint er goeie meugelijkheden um saomen te warken met gebieden in Duutsland.

Waorum dat zo is weet wij niet, maor mandielige noordelijke initiatieven bint over ’t algemien ientaolig Nederlands met een Engels sausie der overhen. An zukswat kuj zien dat der met een Hollandse blik naor het noorden keken wordt en niet vanoet een perspectief van binnenoet. Wij roept de initiatiefnimmers dan ok op: wees creatief en geef de meertaolige vanzölfsprekendheid van Fryslân, Grunning en Drenthe en de verschillende identiteiten roem baon in al je utingen en in je culturele prejecten.

Nim het ok op as oetgangspunt van het gemienschappelijk cultuurbeleid en prebeer het ies um bij overleg of bijienkomsten van Friezen, Grunnegers en Drenten elk de eigen taol proten te laoten. Bij het EBLT doew dat al jaoren. In ’t begun is het vaok even wennen, maor aj der open veur staot is het absoluut meugelk.

‘We the North’ stiet nog in de kinderschoenen en gef gelukkig an hielemaol open te staon veur alle creatieve ideeën en veurstellen van aandern. Het sprek veur zuch, dat het EBLT geern gebroek mak van de oetneudiging en bereid is um met je nao te denken over veurstellingen en prejecten die de schoonheid van de taolige verscheidenheid van Fryslân, Grunning en Drenthe bluien en gruien lat. Meugelijkheden um dinger op batterij te brengen bint er wis en zeker. Het ‘vergeten’ van de eigen taolen en identiteiten tot nou an toe is vast een vergissing west, dat kan niet aans.

Naomens het EBLT,

Dr. Henk Bloemhoff, bestuurslid

Fryske ferzje hjir.

Ien reaksje op We the North? Meertaoligheid heurt bij het DNA van Fryslân, Grunning en Drenthe!
  1. Eelke Goodijk Beantwurdzje

    Hielemaol met iens. Wij moeten meer met mekaor saomen warken en de vanzölfsprekende meertaoligheid in het noorden roem baon geven in oeze utingen en culturele prejecten!

Reagearje

Your email address will not be published. Please enter your name, email and a comment.

* Copy This Password *

* Type Or Paste Password Here *